SDANG KHLUIT KA LYER ILEKSHON M.P HA MEGHALAYA

Ha kane ka kynti ka lyer ilekshon M.P ka suki bha ban rhem wat hadien ar taiew pura jong ka jingpynbna ia ka tarik ilekshon sha ka Lok Sabha. Kumba ngi la dep tip ka sngi thep-vote na ka bynta ka ilekshon M.P ha kane ka kynti ka dei ha ka 11 tarik u Iaiong (Sngi Palei) naduh ka por 7 baje mynstep haduh 4 baje janmiet. Ka dei ka deiti kaba kongsan na ka bynta ki nongshongshnong jong ka Meghalaya, kat kiba la kynjoh 18 snem shaneng, ban iamih ryntih lang na la ki jong ki jong ki iing ki sem ban leit thep ia ka vote lajong. Ka jingkyntu ruh ka long to ngin ym pynsyrwa ei ei ka vote lajong hynrei ngin ia-thep-vote baroh baroh namar ka dei ka hok bad ka deiti kaba kyntang kaba ngi ioh na ka Riti synshar jong ka Ri.

Ka Election Commission ka la pynbna ia ka tarik thep-vote ha ka 17 tarik jong u bnai Lber, 2019 bad baroh kawei ka Ri India ka ka la kyndit thret ban pynkhreh na ka bynta ka M.P ilekshon. Hooid, ki tarik jong ka jingleit thep-vote ki iapher ha ki jylla bapher bapher hynrei ka jingsdang thep-vote ka dei hi ha ka 11 tarik u Iaiong bad kan kut ha ka 19 tarik u Jymmang, 2019 katba ka jingniew ia ki vote pat ka long lang ha kajuh ka sngi, kata ha ka 23 tarik u Jymmang,2019. Ha kane ka tarik ngin sa tip mano na ki party ki ban ioh synshar ia ka Ri India. Kumba ka long mynta ngim pat tip kino na ki party kiba bun ha ka Ri ki ban ioh synshar. Hooid, ngi tip bha ha ki party kiba kham khlain bad kiba kham hakhmat hi ki dei ka BJP bad ka INC hynrei kiwei kiwei kiba iabud ha ka jingkhlain ki dei ka BSP, SP, JD, BJD, TMC, NCP, Shiv Sena, DMK, AIADMK, CPI(M) bad kiwei kiwei ki bym da khlain eh haduh katta ktta.

Kiba kham bunkam eh ha kane ka jingpynkhreh ki dei – ka Election Commission bad ki ophis ilekshon ha ki jylla bapher bapher namarba ki hab ban pynkhreh bha khnang ba ka jingthepvote kan iaid beit iaid ryntih bad kan long ruh kaba jop. Nalorkata, kiba bunkam palat ki dei ki Party kiba hab ban sei ia ki kyrtong M.P ki ban iakhun ha kane ka ilekshon bad kumno ban wad peisa ban pynlut na ka bynta ka ilekshon. Ki hab ban pyndonkam lut ia ki buit ki sap ba ki don khnang ban jop kham bun ki kyrtong lajong ba ki pyniakhun. Shuh shuh kiba bunkam bha ki dei ki kyrtong. Ki ruh hala ka jong ka jong ka bor bad ka buit ki pynkhreh bha kumno ban jop da kaba pyndonkam lut ka bor bad ka buit kumno ban ioh khur ia ka jingjop. Nangta, kiba bunkam ruh ha kane ka ilekshon ki dei ki nongtrei bad ki nongkyrshan jong ki party bad ki Kandidet. Maki ruh katba don la ka jong ka buit bad ka bor ki sei lut kumno ban ioh ia ka jingjop kaba donburom. Kumta, ha kane ka jingpynkhreh na ka bynta ka jingthep-vote jan baroh ki Nong India ki iadon bynta bad ki da bunkam bha ruh na ka bynta ban sei ia ki 543 ngut ki M.P na baroh kawei ka Ri India ban mihkhmat ha Lok Sabha.

Ha ka jingshisha, ha kiwei kiwei ki bynta jong ka Ri India, ka lyer ilekshon ka la shongshit bha bad ki don bun ki bynta jong ka Ri ba ka lyer ka la khluit bha lain. Hynrei, ha Meghalaya, kane ka lyer kam pat da khluit ka shu sdang shongrhem bad sdang shongshit ha ki katto katne ki bynta jong ka jylla. Ka kham rhem bad shit bha ha Garo Hills namar ki Kandidet bad ki Party ki tur rak rak sha ki paidbah. Hynrei hangne ha Khasi-Jaintia Hills kam pat da shongshit bha laitnoh tang ha ki katto katne ki bynta ha kiba ki Kyrtong ki la ioh ban tur puk puk bad ban Kanbas.

Kumba ngi la dep tip bad dep bna ki Kandidet na ka bynta ka 1-Shillong Parliamentary Constituency ki dei u Dr. Jemino Mawthoh na ka UDP bad ba kyrshan lang da ka liang sorkar MDA, u Bah Vincent Pala na ka INC, u Bah Sanbor Shullai na ka BJP, u Bah THS Boney, IND bad u Bah Samuel Hashah, IND). Na ka 2-Tura Parliamentary Constituency pat ki dei ka Agatha Sangma na ka NPP bad la kyrshan lang da ka liang ka MDA, U Dr. Mukul Sangma na ka INC bad u Rikman G. Momin na ka BJP. Na ka liang ki Kandidet te ki la shai bha bad ki paidbah ruh ki la iatip bad iabna bha hynrei kaba sah ka long sa tang  iano kein nongjied kin jied ban pynjop.

Ha Khasi-Jaintia Hills hi ia mynta kiba kham khlain bad kiba kham wan shakhmat ki dei U Dr. Jemino Mawthoh na ka UDP-MDA bad u Bah Vincent Pala na ka INC bad iabud nadien u Bah Sanbor Shullai na ka BJP. La pynshongdor ia kane namar kine ki kham paw bha ha jan baroh ki District  Jaintia Hills, East Khasi Hills, Bhoi, West Khasi Hills bad South West Khasi Hills. Lada bishar pat na ki result jong ki MDC ilekshon kiba dang shu dep shen bad lada bishar na ka jingkyrshan jong ki party kiba don hapoh ka MDA te ngi lah ban ong da kaba suk ba ka jingkhlain kan kham don ha ka liang jong u Dr. Jemino Mawthoh. Hynrei, ym lah ban tip bha ia ka mon ka jong u paidbah ba kham bun shano kin phai bad iano kin jied. Shuh shuh ka jingtrei shitom na ka liang jong ki party kiba don hapoh ka MDA ym da iohi bha, khamtam na ka liang jong ka PDF, NPP, HSPDP bad kiwei. Lada ki paralok kiba don hapoh ka MDA kim trei shitom da kaba pyndonkam lut ki buit ki bor bad ki sap baroh, bad lada kim duh thiah duh dem na ka bynta ban pynjop ia u Dr. Jemino, kan long kaba jwat ban pynliem ia u Bah Vincent Pala u ba la long M.P teng la arsien bad u ba la don lypa ka stock vote INC kaba khlain bha. Nalorkata, kham bun na ki paidbah ha sor bad ha kyndong ki kham ithuh khmat ia u Vincent Pala ban ia u Dr. Jemino Mawthoh, namarba u la long M.P haduh arsien kynthih. Ha kaba iadei bad u Bah Sanbor Shullai na ka BJP, ka vote BJP kaba u bah Shibun Lyngdoh u la ioh mynshuwa ka la poi jin haduh 96 hajar ei ei bad lada u Bah Sanbor u lah ban kamai shuh shuh nalor katei da ka jinglah jong u, jong ka party bad ki nongkyrshan jong u, lehse u lah ban poi sha ka thong. Hynrei, lada um lah ban ioh ia katei ka stock kaba la ioh da u Bah Shibun te kan long sa tang ba ngin dang iakhmih. Kiwei kiwei ruh ki dang iaksaid bha ban poi sha ka thong hynrei ngin dang iakhmih katno ki lah ban kamai vote.

Ha kaba iadei bad ka 2-Tura Parliamentary Constituency ka jingiakhun ka kham jur bha hapdeng ka Agatha Sangma na ka NPP bad u Dr. Mukul Sangma na ka INC. Katkum ka jingiathuh jong ki babun ki briew na Garo Hills ka jingiakhun hapdeng jong ki ka long para ba iakhlain bad ym lah ban ong mano napdeng jong ki ban kham lah. Ha ka jingshisha ia ka Agatha Sangma la kyrshan ym tang ka NPP marwei hynrei la kyrshan da ki paralok kiba don ha ka sorkar MDA kumta ha ka jingshisha ka dei ban kham shakhmat ban ia u Dr. Mukul Sangma. Hynrei ym lah ban kheinsting ia u namarba u la long teng u Chief Minister jong ka jylla Meghalaya la kumba 8 snem ei ei, u la long Minister la bun phew snem, u la long u leader jong ka jylla la bun snem bad u leader jong ka Garo Hills la bun tylli ki snem. Nalorkata, ruh la ithuh lut jan baroh ki paidbah jong ka Garo Hills, nalorkata u la ioh shibun ka jingkyrshan thymmai ha kine ki por ilekshon naduh ki MDC bad ki MLA barim ruh bad shuh shuh ka Garo Hills ka don ka stock vote INC kaba khlain bha naduh mynshuwa ruh bad kumta, ym lah ban kheinkai ia u. Hynrei ka Agatha ruh ka la long MP arsien kynthih bad la long Minister Khynnah ruh jong ka sorkar India, ka mih na ka iing ka sem jong u kpa bakhraw jong ka, u Purno Sangma u ba la long Minister jong ka sorkar INdia, Speaker jong ka Lok Sabha, Chief Minister jong ka jylla bad u ba la long MP ia ka 2-Tura PC la bun tylli ki snem, nalorkata ka ioh ia ka jingkyrshan jong ka sorkar MDA. Kumta, ka jingiakhun ha 2-Tura PC ka long kaba i lyko pom, ym lah ban ong lypa mano ban jop.