|
Da u Bah Philip Marweiñ
Kumba la pynbna ha ka 2 tarik mynta u bnai ka ilekshon na ka bynta ban jied ia ki MDC sha ka Khasi Hills bad Jaintia Hills Autonomous District Council kan long ha ka 27 tarik mynta u bnai, mynta sah sa tang 20 sngi ei ei. Lada ianujor ia kane ka ilekshon bad ki ilekshon kiba mynshuwa, kane kaba mynta ka kham pjah ha kane ka kynti. Hynrei, naduh ba la sdang ka jingthep kyrteng jong ki kandidet mynta la lai sngi ei ei bad da ka jingkaweh jong ki lama ilekshon ryngkat ka sur pyrta jong ki nongkyrshan, ka lyer ka la sdang shongshit hi lain. Ka tarik kaba khatduh ban thep kyrteng ban iakhun ka dei ha ka 8 tarik bad katba ka tarik bakhatduh ban weng noh na ka jingiakhun kan long haka 9 tarik mynta hi u bnai. Kat haduh ba thoh ia kane ka jingthoh ym pat ioh jingkhein lut katno ngut ki kyrtong MDC ki ban iakhun ha kan ka kynti na ka bynta baroh ar tylli ki District Council.
Ka bai thep kyrteng ban iakhun ilekshon mynta ka la poi T.3000/-na ka bynta uwei u nongiakhun bad na ka bynta uwei pa uwei u Kandidet la shah ba un pynlut tang T.5,00,000/- shapoh bad lada don uno uno u ba pynlut palat ban ia kane un shah ha ka jingpynshitom jong ka ain ilekshon kaba kynthup ia ka jingbymshah shuh ban ialeh ia ka ilekshon hadien habud ruh.Ki nongthepvote na ka bynta ka Khasi Hills District Council ki don 7,95,143 ngut katba jong ka Jaintia Hills pat ki don 2,49,334 ngut. Ki jaka thepvote na ka bynta ka Khasi Hills District Council ki don 1433 tylli katba jong ka Jaintia Hills ki don 408 tylli. Ha Khasi Hills District Council ki nongthepvote shynrang ki don 383632 ngut katba ki kynthei ki don 411511 ngut; ha Jaintia Hills District Council pat ki nongthepvote shynrang ki don 120675 ngut bad ki kynthei ki don 128659 ngut.
Katkum ki kyndon ba la buh da ka sorkar (model code of conduct) ym shah satia ia ki kandidet ban wanran ia ka jingiapher niam, kynhun ne jingiapher ha ka ktien ka thylliej da kaba pynkhluit ne pyniashun iapen. Ym shah ban kren bein kren khoh lane thad burom ia kiwei ki party ne kiwei ki kandidet, lait noh tang ia ki policy bad ki prokram ne mat treikam jong ki. Ia ka jingim shimet ne kiba ha iing bad ki lok ki jor jong ki kandidet ym shah ban thad burom ei ei ha ka por ilekshon. Ym dei ban pan vote na ki paidbah ha ka kyrteng ka niam lane ha ka kyrteng jong ka kur ne para jait ne kynhun jaitbynriew. Ym shah ban pynlong politiks lane pynlong jaka kanbas ilekshon ia ki iingmane blei. La khang pyrshah ban ai peisa ne pyunbam peisa ha ka por ilekshon ia ki nongthepvote lane ym bit satia ruh ban theptuh ia ka vote jong kiwei. Ym shah ruh ban pynkit da ki kali ia ki nongthepvote da ka jingthmu ban ioh ia ki vote jong ki. La mana ban ym shah ia ki kandidet lane ki nongkyrshan ban pynthut ia ka shongsuk shongsain jong kiwei ki kandidet lane ki nongthepvote lane ki nongkyrshan jong kiwei pat ki9 kandidet. Ym shah ban pynlong jingialang ilekshon hakhmat ki iing jong ki paidbah lane ban pyrta pyrshah hakhmat iing jong ki kandidet lane jong ki nongkyrshan jong ki. Ym shah ban tah poster lane appeal ha ki kynroh iing ne jingkhang iing jong ki briew khlem ka jingbit jong ki. Kumjuh ruh ym shah ban pyndonkam ia ka jaka lane ka iing jong ki briew na ka bynta ki jingialang lane ialap ilekshon khlem ka jingbit jong ki.
Ym bit ia ki party lane ki kandidet bad ki nongkyrshan jong ki ban pynthut lane pynkulmar ia ka jingialang ilekshon jong kiwei da kaba pynkulmar da ki briew lane da kaba pynkulmar bad pynwit da kaba kylli jingkylli thad burom lane kiwei kiwei ki jait jingpynkulmar. Ym dei ban iaid proseshon ilekshon hajan ki jaka long jingialang jong kiwei ki party lane kandidet. Ia ki poster bad ia ki apil ba la tah da kiwei ki party lane ki nongkyrshan ym dei ban tar lane weng noh da kiwei pat. Lada lap dei ban mudui bad phah kem mar mar ia kita. Ki party lane ki kandidet lane ki nongkanbas ki dei ban da pyntip bha ia ki bor sorkar lane ki pulit shuwa ban pynlong jingialang ha kano kano ka jaka khnang ba ioh jingbit thikna bad ban ioh ruh ia ka jingpahara jong ki pulit. Kane ka dei ka rule kaba pyrkhing bha ba ki kandidet lane ki party ne nongkanbas ki hab ban bud bha khamtam ha kito ki jaka ba don ka jingmana ban pynlong jingialang. Ha kum kine ki khep ki kandidet lane ki party lane ki nongkanbas ki hab ban da pan jingbit bha kham kloi ban ioh jingbit. Haba pynlong proseshon ilekshon ruh dei ban da plan bha ha shuwa bad dei ban da ioh ruh ia ka jingbit na ki bor sorkar shuwa ban pynlong khnang ban lait na ki kynrum kynram bad ki jingpynwit kiwei ki ar. Haba iaid proseshon ruh dei ban iaid da ka jingdonburom bad ban kiar na ki jingpynkulmar ia kiwei kiwei ki party lane kynhun ialap ilekshon. Ha ka sngi thepvote ruh baroh ki party bad ki kandidet ki dei ban iatreilang bad ki bor pyniaid ia ka ilekshon ban iaid beit iaid ryntih bad la mana ia ki kandidet bad ki party ba kin pyndonkam da ki buit poh lane thaw jingkulmar lane pynwit ia kiwei ne ia ki briew jong ka ilekshon. La mana ban kiar na kiwei kiwei ki rukom kiba pynkulmar ne byrngem byrsit lane iashoh iadat ha ka sngi thepvote lym kumta ka ain kan trei la ka jong ka kam. La mana ban ym don ki buit poh kum ka jingkynshoit briew ban thepvote tuh, lane thong da ka peisa ia ki nongthepvote lane ia ki polling agent lane ia ki polling bad presiding ophisar. La khmih lynti ia baroh ki party, ki kandidet, ki kanbasar bad nongkyrshan ba kin long kiba ryntih bad kohnguh ia ka jingpyniaid jong ki briew ka ilekshon. Na ka bynta ka party kaba don ha ka bor synshar kam dei ban shim kabu lane leh khla bad leh donbor ei ei ruh ha ka por ilekshon. Lada lap ba ka party kaba don ha ka bor, lane lada don ki Minister lane ki briew jong ka party kiba leh tam ia ka ain kito kiba lap ki dei ban report mar mar sha ki bor pyniaid jong ka ilekshon ban leh iakaba donkam.
|