Tura: Ka Agatha K Sangma, ka la sdang ia ka jingiaid kanbas paidbah jongka, na ka bynta ban pynkhreh ia ka elekshon Lok Sabbha, da kaba sdang ia ka jingialang paidbah na Adokgre ha North Garo Hills lane kaba la khot ieid da U PA Sangma kum ka “Chenanggre” lane ka jaka jong ka jingjop.
Na ka bynta 30snem kynthih, U PA Sangma,ula ju sdang ia ka jingialang paidbah jongu, na Adokgre bad kumta ka Agatha ruh, ka la sdang mynta la shiphew snem na katei hi kajuh ka shnong, ha kaba ka la ju iai jop man ba ialeh.
Haba kren ha ka jingialap elekshon kaba nyngkong eh jongka, kum ka kandidet NPP, ka Agatha ka ong “Ha u snem 2008, nga la rung sha ka politics bad nga iakhun ia ka elekshon Lok Sabbha bad ha katei ka por u kpa jongnga, u don ha syndah jongnga. Nga dang khynnah bha ha katei ka por bad ha katei ka por U Mukul Sangma, ula kyntait ban ialeh pyrshah ia nga. Hynrei mynta, nga la ih bha ha ka sain pyrthei bad dei na katei ka daw, ba u mih ban ialeh pyrshah ianga”.
Da kaba kular, ba kan rah ia ki jingeh jong ka Garo Hills sha Parliament, ka Agatha, ka khot ia ka jing kyrshan radbah jong ki paidbah na Garo Hills, namar ba ka la tip bha ia ka jinglong jingman jong ka thain hi baroh kawei.
“Ka NPP, ka la dei ka seng jong ka thain hi baroh kawei bad ka trei tyngeh, na bynta ka bha ka miat jong ka thain shatei lam mihngi” ong ka Agatha.
U Bah DD Lapang, nongai jingmut jong ka sorkar Jylla, haba u kren, ula ong “Haba ka Agatha, ka bam smai kum ka myntri jong ka sorkar India, kum ka myntri kaba khynnah tam, baroh ki niew burom ia ka. Ngi dei ban sngew sarong ia ka jingshemphang jongka bad ka dei ka nongialam kaba bit na Garo Hills, ban leit sha Lok Sabbha”.
U Bah Lapang, ula ong shuh “Nga la don ha ka por jong ka jing bhabriew jong ka Congress, hynrei mynta kam don shuh. Ka mynsiem jong ka Indira Gandhi, U Rajiv Gandhi, kam don shuh bad ka Sonia Gandhi, ka la nang tymmen mynta bad kumta ka don ka jingbakla ha ka jingtrei kam jong ka AICC. Nga la iehnoh na ka parti kaba nga la trei la 50snem kynthih”.
U Conrad Sangma, ha ka jingkren jongu, ula pynsngew ba ka elekshon sha Arunachal Pradesh, ka long kaba donkam bha, namar ba ka NPP, ka dang ia ksaid ban ioh rung ha katei ka Jylla ruh kumjuh bad ba ka NPP, ka kwah ban pyn ia tylli ia ka thain hi baroh kawei, na ka bynta ban kren ia ki jingdonkam jong ka thain kham sawa ha Parliament
U Conrad, ula ong shuh shuh ba U PA Sangma, ula shakri ia ka thain shatei lam mihngi lem bad ia ka Garo Hills, la 40snem kynthih bad u paidlang ka Garo hills lem bad ka thain shatei lam mihngi, ki ieid eh ia u, hynrei um shym la pyndep ia ki jingphohsniew jongu bad mangi ki khun, ngi kwah ban pynurlong ia ki jingphohsniew jongu ha Garo Hills”. U Conrad, u iathuh ruh ba ka sorkar MDA, kaba synshar ha ka Jylla bad lada ka jop ka Agatha, kan pynsuk shibun hapdeng ka jingiadei ka sorkar Jylla bad ka sorkar India ruh kumjuh.
Phi don ban ong eiei?