Ka Umsawkhwan Sports Club, ka la ioh ban khur ia ka namjop kaba nyngkong ha kaba sdang ha 2nd FKJGP Football Tournament 2018, hadien ba ka la lah ban pynliem noh pyrshah ia ka Umeit Sports Club da 1-0, ha ka jingiakhun kaba la long hynnin ka sngi Saitjain ha madan ialehkai ka shnong Nongsder.
Khyndiat haba phai sha ki ar-kylla jong katei ka jingiakhun, ha kaba ka kylla step jong ka jingiakhun ka la kut da ka jingiakhaid kaba 0-0, hynrei haba la bteng ka kylla miet, ki rangialehkai jong kitei ki ar-kynhun, ki la pyrshang ban ialeh tyngeh na ka bynta ban ioh thep kol bad khamtam eh na ka bynta ban khur ia ka namjop ha kaba sdang jong katei ka lympung ialehkai.
Kumta haba ka jingiakhun ka la nangiaid shakhmat, uwei na ki rangialehkai ka Umsawkhwan SC, la ioh ia ka kabu kaba biang ban thep ia katei ka kol bad kaba la pynlong syndon ia ka kynhun ba kan lah ban pynliem noh da 1-0 pyrshah ia ka Umeit SC bad khur syndon ia ka namjop kaba nyngkong.
Ia katei ka lympung ialehkai phutbol, kaba la pynlong da ka FKJGP Umiam Circle, la plie pyrda da u Bah Luistar Lyngdoh, General Secretary ka FKJGP ha Ri Bhoi, ha ryngkat ka jingdon u Bah Welcome Shangpliang, Rangbah shnong ka Nongsder bad uba la long kum u symbud kongsan, ki dkhot ka FKJGP lem bad kiwei de ki riew rangbah jong katei ka thain.
Ha kaba plie ia katei ka lympung ialehkai, la ioh ruh ia ka jingkren na u Bah Luistar Lyngdoh, ha kaba kum u nongialam ka FKJGP, u la pynpaw ia ka jingkmen ban iohi ba ki nongialam ka Umiam Circle, ki la lah ban pynlong ia katei ka lympung ialehkai phutbol, kaba long ruh kum shibynta ban iarap ha ka ban kyntiew ia ki kam ialehkai phutbol, ym tang ha katei ka shnong hynrei ha ka thain hi baroh kawei.
Ha kajuh ruh ka por, u Bah Luistar Lyngdoh, u la ai ia ki kyntien kyntu kynpham ia ki rangialehkai kiba la ialehkai ha katei ka sngi, da kaba ong ba ki dei ban iai pynmlien ialade bad iai imsngi ha ka phutbol, khnang ba kin nanglah ban nangkiew ha ki kam ialehkai bad ba ki dei ruh ban kiar ha ki jingmlien ban dih ia ki jingdih kiba sniew.
U Bah Luistar Lyngdoh, uba dang pajut kti ia ki rangialehkai ha kaba sdang ka phutbol ha Umiam.