Khliehriat: Ka Umlyngsha Youth Society & Sports Club (UYSSC), Umlymgsha Vilage , East Jaintia Hills District,ka la ioh ban sdang ha ka sien kaba nyngkong ia ka lympung ialehkai kaba tip kum ka ” Umlyngsha Futsal Tournament 2018″ ka la long ha kane ka 15tarik une u bnai Nailur ha Madan Umlyngsha.
Ia kane ka lympung la wan ban plie pyrda ia ka da u Bah Maldini Amkhloo uba dei u Secretary Shnong jong ka Lakadong Umlatdoh ha ka por 11baje mynstep ryngkat ka jingiadonlang u Waheh Shnong jong ka Umlyngsha u Bah Mewel Syrti bad ryngkatlang ki katto katne ki rangbah na ka shnong Lakadong Umlatdoh, bad ha ka jingiadon ki dkhot jong ka Club.
U Bah Amkhloo uba long ruh u kongsan ha katei ka sngi u la ai ka jingiaroh ia ka Sports Club kaba lah ban pynlong ia kum kane ka lympung ialehkai kaba ki samla jong ka thaiñ kin lah ban pyni ia ka sap ka phong jong ki ha ka liang ka phutbol khamtam kin lait na ki kam sñiew ba bunjait bad haka juh ka por u ai ruh ia ka jinsneng jingkyntu ia ki rangialehkai ha kane ka sngi ha shwa ban sdang ka jingialehkai.
Shuh shuh u la pynpaw ruh ia ka jingsngewnguh ia kane ka Club namar ka jingkloi ban ai ia kawei ka Certificate ia u wei u Samla (Under 12) uba na ka shnong Lakadong Umlatdoh hadieñ ba u la shah jied ha ka SAI Shillong bad lyngba ka jingpynlong kum ia kane ka Lympung kan ai jingmyntoi shibun ia ki samla jong ngi, la pynkut u Bah Amkhloo
Na ka liang u Waheh Shnong jong kane ka Shnong u la ong ngin don ryngkat bad ka Sports Club ha kino kino ki bynta khamtam haba pynlong kum kine ki lympung ialehkai hapoh ka shnong lane ka thaiñ jong ngi.
Ha kane ka sngi la wan ban iashimbynta haduh 16tylli ki kynhun bapher bapher jong ka thaiñ.
Kumta ia kane ka lympung la sdang naduh kane ka sngi saitjain ba la dep bad yn pynkut ia ka ha tang hapoh lai taiew don hi.