Sdang ka Synod College da ka kyrdan pule MA

Shillong 12 Naiwieng:   Ka bor pyniaid jong ka Synod College kan sdang noh ia ka kyrdan jingpule Master degree ne Post Graduate course da ka subjek Political Science. Kane ka jingthmu yn sdang noh shen.
Haba kren mynta ka sngi, sha ki nongthoh khubor, u Principal ka College u Dr. D Wanswett u la ong ba ka kolej ka la ioh ia ka jaka ha  Maw pdang ha u snem 2010 ha ka jingheh kaba 9.5 akar tam ban shna ia ka jaka pule jongka.
Ka jinglah ban sdang noh ia kane ka kyrdan pule ka dei sa kawei pat ka lynti iaid kaba jrong jong ka kolej ha ka jingshakri jongka. Nalor ban plie ia kane ka kyrdan pule ba kham shalor, ka bor pyniaid ka kolej kan pynthymmai kan pynbha ruh ia ki rukom treikam ban plie sa kiwei ki jingpule ia ki samla. Ka Synod College Shillong kan rakhe ruh ia ka jingdap 50 snem ha ka 20 tarik Naiwieng, la iathuh u Dr. D Wanswett.
”Ia ka Synod College la plie ha u snem 1965 da ka jingthmu ban kyntiew ia ka pule puthi khamtam ia ki briew na nongkyndong kiba duna ha ka ioh ka kot”, la ong u Dr Wanswett.U la iathuh ba ka kolej ka la plie ia ki jingpule under-graduate course ha ka Arts, Commerce, Science, Bachelor of Computer Applications (BCA) bad ka Higher Secondary ha ka Arts, Commerce bad ka Science.Nalor kine, ka kolej ka la ai ruh ia ka jinghikai kiba iadei bad ki kam ki jam ne Professional course bad Certificate Course.