Shillong 20 Lber: Ka Seng Khasi Kmie, hynnin ka sngi Ïewduh, ka 19 tarik Lber 2025, ka la sdang ba kan pynriew ia ka ksing ka bom ka nakra ka tangmuri, kum ka dak ban pyntip sha la ki para kur ki para kha, ka bri u Hynñiewtrep, ba ka por ka samoi jong ka shad ka kmen ka la poi
Ka jingsei ïa kine ki tiar tem tiar put, ka wan ka dur jong ka nguh ka dem ka lehniam ka ‘Kyntiew Ksing’, ba la long ha phyllaw jong ka ïing Seng Mawkhar, Shillong.
Mynta ka snem, ka shad suk mynsiem kan long ha ka 5, 6 bad ka 7 tarik u Ïaiong, 2025, kaba dei artad ka lyngkhuh snem jong ka jingrakhe ïa u mawmer jong ka jingdap ba 125 snem, ka jingseng ia ka Seng Khasi.
Ia ka jingïalang la pynïaid da u dkhot ka JPK u Rgh Richard H Dkhar, ha kaba la ïoh pat sa ïa ka jingkren na u President Seng Khasi Kmie, u Rgh O. Pyngrope.
Hadien kane naka liang u Riew Tymmen Riw San ka Seng Khasi Kmie, u Rgh Donbokstar Kurkalang, u la shim ïa ka bynta ban leit sha ka nguh ka dem, ka ka shat ka kheiñ ka khnong ka bishar, ha kaba u buh ïa ka dem ka kyrpad ba U Blei Trai Kynrad, un sngew un sngap bad ban pdiang ïa kane ka shad ai nguh aidem kaba shi sien shi snem u khun bynriew, ba lyngba ka jingdon lang najrong na tbian kane ka shad ka kmen kan da phuh da phieng, ban da ïoh ïa ka suiñ bneng kaba shit ba shai, ba ki nongshad kynthei bad shynrang kin ïoh ïa ka shad ka kmen kaba suk ba palei, ba ki duhalia kin ïoh ïa ka buit ka bor ban tem ban put ïa ki sur ba bang ba thiang bad u ïaid u kai u khmih ïaid un da ïohi ïa ka shad ka kmen kaba shongkun.
Haba la biang ka ñia ka jutang, u riew tymmen riew san u la shat kawei ka pylleng, kaba kumba la ïa pan ba paw shai naka lengbah ka lengsan ba ka kam hi kan bit kan biang.
Hadien ba la dep kine ki kam baroh, ki duhalia, ki la wan shakhmat ban tem ïa baroh ki hynñiew tylli ki skit bad ba la pynkut ïa ka jingïalang da ka kyntien ai khublei, kaba la ai na u Cultural Secretary Seng Khasi Kmie u Rgh Hamarsing Khahmar.
Hadien ba la dep kyntiew ksiang, nangne shakhmat man la ka janmiet, kan don ka jinghikai shad ïa ki hep barit bad kumjuh ïa ki khun samla kaban ïai bteng tad haduh shi sngi shwa pat ban sdang jong ka shad.
Phi don ban ong eiei?