Shillong: Ka lumpung ialehkai phutbol kaba saw ka Assam Rifles Invitational Football Tournament ka la sdang myn hynnin ka sngi ha madan Jawaharlal Nehru Stadium, Polo ha kaba ka Lawmali SC ka la iakhun pyrshah ia ka Narwan SC na East Jaintia Hills.
Ha kane ka jingialehkai, ka Lawmali ka la pynliem da 3-1 iaka ia ka Narwan.
Ha kane ka jingialehkai, ki don baroh 16 tylli ki kynhun ba iashim bynta kaban pynkut haduh ka 16 tarik mynta u bnai. Ia kane ka jingialehkai la pynlong ban rakhe ia ka jingdap 184 snem ka Assam Rifles.
Ia ka jingialehkai la plie da u Director General ka Assam Rifles u Lt Gen Sukhdeep Sangwan, uba la pdiang sngewbha ia ki nongialehkai ha kane ka lumpung.
“Ka jingialehkai phutbol ka dei ka lynti jong ka jingim bad balei nga ong ia kane ka dei namar ba ka jylla Meghalaya ka dei kaba nyngkong ban pynlong ia ka Baby League,” la ong u Lt Gen Sangwan.
U la ong ba ka Assam Rifles ka dei kawei ka paralok jong ki riewlum ha kaba ka jaka treikam jongka ka don ha Shillong bad kan iaid don bad ki paidbah kane ka thain.
“Ngi tyrwa ia ki jingiarap na ka bynta ban pynlong ia ka Baby League ha Laitkor ban kyntiew ia ka phutbol ha Meghalaya” la ong u Lt Gen Sangwan.
Kiba iashim bynta ha kane ka lumpung ki long ka Smit, ka Assam Rifles, Lawsohtun, Eastern Pirates, Seven Brothers, Sawmer, Kith United, Umphrup, Mawpdang, Madanryting, Nongthymmai, Nongkrem, Mawpat bad ka Mawkhar.
Lashai ka sngi ka jingialehkai kan long hapdeng ka Lawsohtun pyrshah ia ka Eastern Pirates por 10:30 am, ka Seven Brothers pyrshah ia ka Sawmer por 1:30pm.Baroh kane ka jingialehkai kan long ha madan Assam Rifles ha Laitkor.
Phi don ban ong eiei?