Sdang ka lympung ialehkai Kriket jong ka SPD Hood, ha Umran Niangbyrnai

Nongpoh:Ka lympung ialehkai Kriket kaba la pynlong da ka SPD Hood ha madan ialehkai ka shnong Umran Niangbyrnai, ka la sdang hynnin ka sngi bad ha kaba sdang katei ka Lympung, ka jingiakhun ka la long hapdeng ka Rongmesek pyrshah ia ka Lumningrim.

Ia katei ka lympung ialehkai, la wan ban plie da u Bah Luistar Lyngdoh, President ka FKJGP ha Ri Bhoi, ha ka jingdonlang u Bah Stephan Kharbani, Rangbah shnong Umran Niangbyrnai, kiwei pat ki nongialam ka FKJGP, kiba kynthup ia u Bah Gabriel Sun, u Bah George Tangsan lem bad kiwei de ki riew rangbah.

Hapoh katei ka lympung ialehkai, ki la don kumba 28 tylli ki kynhun ialehkai na ki jaka bapher bapher kiba la wan ban iashimbynta.
Haba iadei bad katei ka lympung, ki nongpyniaid ki la ong ba ka jingthmu jong ban pynlong ia katei ka lympung, ka long ban kyntiew ia ka sap ka phong jong ki khun samla, kiba don shisha ia kata ka sap kaba kyrpang ha ka kam ialehkai Kriket.