Shillong:Ka lympung ialehkai bol ki khynnah rit ba la tip kum ka 2nd Meghalaya Baby League 2019 ba la sdang ha ka sngi Saitjain ha madan third ground Polo.
Ha kane ka sngi sdang ki don hynriew tylli ki team kiba la wan ban ialehkai ryngkat kiba ha iing hasem bad ki paralok ban ai mynsiem ia ki khynnah ban ialehkai bha.
Ha ka samoi mynta u snem ki don 12 tylli ki team ha ka Shillong centre, bad la phiah ha ar bynta ka Western bad Eastern Conferences.
Ki team ba ialehkai baroh ha ka sngi Saitjain ki dei na ka Eastern Conference, kynthup ia ka laduh ha ka samoi ba la dep ka Langsning Greenergy Lions, Kickstart FCC Rhinos, Unified Gorkha Gators, bad ki kynhun ba thymmai ka Shillong Lajong Coyotes, Titan Otters Football Academy bad Mawkhar Roosters SC.
Kawei ka team ka hap ban ialehkai saw tylli ki jingiakhun katkum ka kyrdan ne rta ki khynnah, katba ha ka U-6 ka dei tang ka jingialehkai sngewbha ban pynshlur ia ki khynnah.
Ia ki jingialehkai la sakhi lang da ki riew rangbah kynthup ka General Manager ka All India Football Federation ka Swati Kothari, President ka Meghalaya Football Association Bah Larsing Ming Sawyan bad ki nongmihkmat na ka Tata Trusts.
Ka jingialehkai hapdeng ka Titan Otters bad Shillong Lajong Coyotes ka long kaba iakhaid bad khur nam jap mar ar sien. Ka Otters ka la jop ha ka jingialehkai U-8 bad U-10 da 6-0 bad 5-2 kol, katba ka Lajong Coyotes ka la jop ha ka jingialehkai U-11 bad U-12 da 4-2 bad 5-2 kol.
Ka Kickstart FCC Rhinos ka la jop ha baroh saw tylli ki jingialehkai pyrshah ia ka Unified Gorkha Gators, katba ka Langsning Greenergy Lions ka la pynliem pyrshah ia ka team Mawkhar Roosters ha baroh ki jingialehkai.
Ki kynhun ha ka Western Conference kin iakhun ha ka sngi Saitjain ban wan. kynthup ia ka Pay for Right Flying Squirrels, Touchline NE Cubs, Onsides Gibbons, Mawlai Raptors, JNS Jaguars bad Nongthymmai GC Scorpions.
Ki prokram ialehkai Meghalaya Baby League ha kiwei ki central yn sa pyntip hadien ia ka tarik.
Phi don ban ong eiei?