Sdang ka lehniam behdeinkhlam, ka Sein Raij Jowai

Jowai, 10 Naitung:
Ka lehniam Beh deinkhlam ki khon Niamtre ka Sein Raij Jowai ka la sdang mynta ka sngi ha ka ka ki khon ka Khon Raij kaba dei ka na Chilliang Raid ki la wanrah ia u Symbud Khnong sha ka jaka ha Loom Soo Iung (Newhill) Jowai.
Ki khon ka Niamtre na ka dong Chilliang Raij ki la iamih paidbah ha ryngkat ki bom ki ksing bad ki tangmuri ban leit shaw ia utei u Symbud Khnong, u dieng tylli na Riat Turiem ha kaba la pynthiah ia u ha ka jaka Sein Raij ha Loom Soo Iung.
Ka lehniam Behdienkhlam kan kut ha ka sngi 13 tarik bad ha kine ki saw sngi yn pyndep ia ki lehniam bapher bapher da u Dolloi, u Langdoh, ka Langdoh ha ryngkat ki sangot ki maji bad ki Wasan.
Ka lehniam Behdeinkhlam ka long ka lehniam kaba la leh man la u snem ban behkrat ia ka Khlam na ka imlang ka sahlang kiba lah ban wan ha ka dur ki jingpang, jingshitom, ki jingpynjot ka bor mariang bad kino kino ki jingsniew ha ka imlang ka sahlang.
Ka AJYWO Central Body lyngba u President jong ka u Bah M H Dkhar, ka ai khublei Behdeiñkhlam ba suk ba kmen ia baroh ki khun ki hajar jong ka Ri Jaiñtia, kyrpang eh ia kito ki ba dang don ha ka Niamtre ki ba dei ban rakhe bad pyndep ia ka niam ka rukom ha kane ka Behdeiñkhlam.
Ka AJYWO ka ngeit ba lyngba kane ka Behdeiñkhlam ba mynta un kyrkhu kyrdoh ia baroh ki khun jong ka Ri Jaintia ba kin ioh ia ka met ka phad kaba koit ba khiah krat bad ruh ba kin nang roi kyrhai ha baroh ki liang naduh ka kamai ka kajih, ka ioh ka kot, ka jingnang jingstad bad ha baroh ki kam ki jam jong ki.
Ka AJYWO ka la ong ruh “To ngin rakhe ia kane ka Behdeiñkhlam da ka jingsngewrit, da ka jingtip briew tipblei bad ruh ha ryngkat ka jingsngewnguh ia U Tre-Ki-Rot Nongbuh Nongpynlong ia kiei kiei baroh namar ki jingkyrkhu jong u ia ngi baroh lang ha ka jingim jong ngi kaba man la ka sngi.
Ha ka juh ka por, ka Jaintia Students’ Union (JSU) Sengkmie lyngba ka Art & Culture Committee ka pynpaw iaka jingsngewkmen ban pathai ia kane ka khubor ban ai khublei kyrpang bad kitbok kitrwiang ia baroh ki khun ki hajar jongka Ri lum Jaintia khamtam eh iaki khun ka Niam Tre kiban rakhe iaka Behdein khlam jong ki raij bapher bapher mynta U snem 2016.
Na ka liang ka JSU ka phah ia kane ka jingai khublei bad kit bok kit rwiang sha baroh lang ki paidbah ba lyngba kane ka jingrakhe don burom ia kane ka Behdeinkhlam ngin ioh shibun ki kyrkhu kyrdoh na u TreKirot Kynrad ha ka liang ka koid ka khiah, ka trei ka ktah, ka pule puthi ka bha ka miat haka imlang sahlang baroh kawei.