Sdang ka ksing ka Shad Suk Mynsiem

Shillong, 22 Lber:
Ka Seng Khasi Kmie, Mawkhar Shillong hynnin ka sngi ka 21 tarik u Lber 2017, ka la sei ïaka ksing ka dhah, ka tang-muri ka shaw shaw, ban sdang ban tem ïaki, kum ka dak ban ban pynkyn-maw ïala ki para kur ki para kha ban pynkhreh naka bynta ban ïashim bynta sha ka Shad Suk Mynsiem.
Ïa kane ka jingtem ksing la pynlong ha phyllaw jong ka Ïing Sng ha Mawkhar, Shillong.
Ha shwa ban tem ïaka ksing, la ioh shwa ïa ka jingkren na u General Secretary ka Seng Khasi u Rgh Arwan S. Tariang, uba la pdiang sngewbha ïa baroh ki para riew seng kiba la wan ban sakhi ïa kane ka sngi ba kynthup ïa President ka Seng Khasi u Rgh Bantei S. Rumnong, u Chairman bad Secretary ka Cultural Committee u Rgh P.D Nongrum bad u Rgh Rangpher Rynjah, President ka Seng Kynthei bad kiwei kiwei.
Hadien kane la shimti pat da ka Komiti u Tymmen u San ka Seng Khasi Kmie, ha kaban leit sha ka nguh ka dew, ka dwai ka phirat bad ka shat ka kheiñ, ban ïa pan na U Blei Trai Kynrad U Nongbuh U Nongthaw, ba ka ha kine ki artaiew jong ka jingpynkhreh, ba ki kam ki jam kin ïaid beit kin ïaid ryhtih. Ïa ka nguh ka dem la pyndep da u Chairman ka Komiti u Tymmen u San, u Rgh Skor Jala ha kaba la don lang u Rgh Secretary ka komiti u Rgh Kworshon Marbaniang.
Hadien ba la dep ka nguh ka dem ka khan ka shat, ba la sdang ban tem pat ïa ka ksing ka dhah bad put ïa ka tangmuri. Mynta ka kynti ïa ka Shad Suk Mynsiem yn pynlong ha ki lai sngi, kata ha ka 8, 9 bad ka 10 tarik u Ïaiong, 2017.
Naka liang ka Cultural Committee ka pyntip ba naduh kane ka sngi, ha kine ki artaiew kiban wan, kan don ka jinghikai shad ïa ki khynnah barit haduh ki khun samla kynthei bad shynrang kaban sdang naduh ka por 5:30 janmiet ha iing seng ha Mawkhar.