Sdang ka Health Mela ba ar sngi jong ka Mawkynrew PHC

Shillong, 03 Jylliew:
Ka Mawkynrew Primary Health Centre ka la plie mynta ka sngi, ia ka Health Mela ba ar sngi jong ka ia kaba la bei tyngka da ka National Health Mission. Ha kane jingialang plie ia ka Mela la iadon lang ruh u Bah A. L. Hek, u myntri ba dei peit ia ka tnad ka koit ka khiah ha ka sorkar jylla, U Bah R. Pyngrope, u MLA ka Mawkynrew Constituency, u Bah T. Chyne, MLA ka Sohra, U Bah B. Lyngdoh, MDC ka Mawkynrew Constituency, Dr. R. Wankhar, DHS (MI), Dr. M.R. Basaiawmoit, DMHO, East Khasi Hills, Dr. (Mrs) J. B. Ranee, DMCHO, Bah WB Mar baniang, BDO ka Maw kynrew C&RD Block, bad u Bahi Starling Nongpluh, u ba dei u Sordar ka shnong Mawkynrew. Ka Mawkynrew PHC ka kynthup bad dei peit ia ki shnong Mawkynrew, Mawlien, Umtong, Lynshing, Tmoi, Umsham, Nongpyrdi, Mynriah, Siltham, Khwad, Mawlatbah, Umblai, Mawrasai, Mawkria, Wahmawlein, Mawlakhiat and Wahlyngdoh. Haba kren kum u Kongsan u bah Hek u la ong ba ka jingthmu ba kongsan eh jong ka Primary Health Centre ka long ban ai ka jingiarap kaba hajan ia ki briew khamtam ha ki thain nongkyndong kiba don hapdeng ka jingshitom.U la kyntu ia ki paidbah ka thain ban shim ia ka kabu namar ka jingdon ki lad ai jingiarap ha kum kine ki Health Centre. U Myntri u la pynshlur ia ki longkmie ban wan ha ki PHC khnag ban ioh ia syllok bad ki doctor ne ki nongsumar ban ioh jingtip kumno ban sumar ka por armet ban iada na ka jingiap ne shitom U la pynshlur ruh ia ki paidbah katei ka thain ban pynrung kyrteng ha ka Megha Health Insurance Scheme (MHIS), khnang ba kan long ka jingmyntoi ia ki hi.
Mynta ka sngi la ia don kumba 400 ki riewpaidbah kiba la poi sha katei ka Mela ia ka ba la pynlong ka kynhun ba tbit jong ki Doctor na Civil Hospital, Shillong, Ganesh Das Hospital, Shillong bad NEIGRIHMS, Shillong. Mynta ka sngi la pynlong ruh ia ka prokram sam khusnam ha ki nongtrei ASHA ha kaba ia ka nam Best ASHA jong ka Mawkynrew C&RD Block na ka bynta u snem 2014-2015 la ioh pdiang da ka kong Tiewlinda Songthiang na Jongksha –B bad ka kong Sitamary Nongrum na ka bynta ka snem 2015-2016 ha kaba ia kitei ki khusnam la sam da u Kongsan uba la thung dieng ruh hadien katei ka jingialang.