Sdang ka Congress, da ka jingialap pynduh pisa

Shillong, 3’lyngkot:
Ka Indian Youth Congress (IYC) ka la sdang naduh mynhynin ka sngi ban ialap paidbah ban ia kren halor ka jingmih na ka jingpynduh ia ki tyngka rim bad katei ka rynsan jong ka seng Congress la tip kum ka ‘Chaurahe Pe Charcha’. Ka Meghalaya Pradesh Youth Congress (MPYC) kan pynlong ia katei kajuh ka prokram ha kylleng ka jylla bad ka la ong ba kan pyntip paidbah halor ka jingpynduh tyngka rim bad kan ieng ha ka nongrim kaba ka la dawa san tylli ki mat na ka sorkar pdeng kaba ka la dawa ha ka 28 tarik u nohprah, 2016.
Ka seng Congress kan pan jubab na u myntri rangbah ka ri u Narendra Modi halor ki san tylli ki mat, kitei ki san tylli ki mat ki long ba naduh ka 8 tarik u naiwieng haduh mynta katno ki tyngka tuh kiba ka sorkar ka la ioh sei shabar, katno ka jingduhnong ki paidbah ka ri ha ka kamai kajih namar ka jingpynduh tyngka rim, katno kiba duh ia ki kam ki kam jong ki naduh ba pynduh ia ki tyngka rim, katno ngut ki mynsiem briew ki la duhei bad balei ba ka sorkar kam siew bai lutksan sha kiba haing hasem jong kiba iap.
Kiei ki jingiamir jingmut ka sorkar bad kiba kumno ki jingpynkhreh la shim shuwa ban shim ia ka rai pynduh tyngka rim, balei ym shym la syllok bad ki riew shemphang shaphang ka ioh ka kot ne bad ka RBI shuwa ban pynbna paidbah ia katei ka rai pynduh tyngka rim.
Ka seng Congress ka la pan jingshai ruh hato la ka sorkar kan thad madan ne-em ia ki kyrteng ki briew , ki jaka khaii khaba ne ki jaka pule kiba thep pisa T.25 lak tyngka ha ki account jong ki?.
Ka la dawa ruh ba dei ban pynkiew noh ia ka jinglah ki paidbah ban sei pisa, dei ban ai sut ruh kaba 18 tyngka na ka shispah ha ka shisnem sha baroh kiba don pisa ha bank, ka la dawa ban pynduh noh ia baroh ki jingshah ot khajna ha ka jingiathep ia phah pisa lyngba ka internet ne mobile (Digital Transaction).
Ka la dawa ruh ba ka sorkar ka dei ban pynhiar dor mar shiteng ia ki marbam paidbah kiba sam rashon lyngba ka PDS na bynta ka shisnem katkum ki kyndon ka Food Security Act, bad dei ruh ban ai bonus kaba 20 na ka shispah kaba long palat ia ka MSP jong baroh ki jait jingbam.
Ka la dawa ba ka sorkar ka dei ban thep pisa T.25 hajar tyngka sha ka account jong kawei pa kawei ka kynthei kaba dei na ka longing kaba duk (BPL) kum ka jingsiew bai lut ksan namar ka jingjynjar jong ki na ka jingpynduh tyngka rim.
Dei ban pynkiew ar shah ia ka bai bylla sngi na ka skhim 100 sngi na bynta ka shisnem, ka la dawa ruh ba ka sorkar ka dei ban lum jingkhein ia baroh kiba la duh ia ka kam jong ki lyngba ka jingpynduh tyngka rim bad dei ban siew bai lutksan ruh ia ki baroh, ia kane ka kyrwoh khubor la pyllait paidbah da u President ka MPYC u Richard Marak.