Sdang ka Behdeinkhlam ka Seinraij Jowai

Shillong, 8 Naitung:
Ka Behdeinkhlam, ba la pynlong da ka Sein raij Jowai, ka la sdang mynta ka sngi da kaba wan rah ia ka symbud khnong Blai na riat Turiem, na ka jaka ba ki pom ia ka bad ba la leit buh ia ka ha Lum sooyung, Jowai.
Ha kawei pat ka khubor, ki Sengbhalang na Ri lum Jaintia ka JSU/JYF/HNPF ki ai khublei Behdeinkhlam basuk ba kmen ia baroh ki khun ki hajar jong ka Sein Raij Jowai, Sein RaijTuber, Sein Raij Muthlong, Sein Raij Ialong bad ka Sein Raij Mukhla, kaba dei ka shad lehniam ba shisien shisnem jong ki Raij bapher bapher hapoh ka  Ri Jaintia.
Ha ka kyrwoh ba la pyllait da ki lai Seng ki ai ka jingkyrkhu kyrdoh bad kit bok kit rwiang ia baroh ki khun ka Ri Jaintia na ka bynta ka Beh-Dein Khlam ba kan long ka ba iaid beit iaid ryntih, ka ba dap da ka jingsuk jingkmen ha ryngkat ka jingkyrkhu kyrdoh da u “Tre Ki Rot”, “U Nongbuh Nongthaw” ia kiei kiei baroh khnang ba ki khun ki hajar jongki Raij bapher bapher bad jong ka Ri Jaintia hi baroh kawei kin ioh ia ka koit ka khiah, kan bha ka kamai kajih bad nangroi parum pareh ka jaitbynriew ryngkat bad  ka shongsuk shong sain ha baroh ki liang jong ka jingim jong ki.