Sdang ka AMKA ia ka jingrakhe ba dap 50 snem ba 3 sngi lynter ha shnong Purduwa

Nongpoh:Ka All Meghalaya Karbi Association AMKA, kaba dei ka kynhun jong ki jaidbynriew Karbi, mynta ka sngi ki la sdang ia ka jingrakhe halor ka jingdap ba 50 jong katei ka kynhun bad kaba la seng naduh u snem 1975.

Katei ka jingrakhe dap 50 snem lane ka Jubilee rupa jong ka AMKA, la pynlong ha shnong Purduwa, Ri Bhoi bad katei ka jingrakhe kan sa kut ha ka 3 tarik mynta u bnai.
Haba sdang jong katei ka jingrakhe, la sakhi da ka jingdon u Bah Mayralborn Syiem, MLA ka Nongpoh kum u kongsan, haka jing ia donlang u baj Robert Jone Ronghang, President ka AMKA, Bah Bistocan Timung, Secretary, u Bah HS Engleng, Adviser ka AMKA lem bad kiwei kiwei ki dkhot.

Ha katei ka jingrakhe lehkmen ba 3 sngi, naka liang ki Nongïalam ka AMKA ki la buh ïaki jingiakop bapher bapher kiba kynthup naduh ki jingiakop ialehkai Tynrai (Traditional Sports Event), ki jingiakop shad bad ki jingiakop rwai tynrai, ka jingiakop pyni riam tynrai (Traditional Fashion Show lem bad kiwei kiwei ki program kiba la bsuh ban pynlong ha kitei ki 3 sngi.