Sdang iap Thngan ki Nongrep.       Babu Kular Khongjirem.      

Shillong 19 Jymmang: Une u  snem 2024 mynta u dei u snem ‘ nem sniew’  ia ki nongrep bapli.Ki nongrep bapli na kylleng sawdong  ki jaka jong ka state Meghalaya jongngi ki la sdang kyrkaw bad kyrthat lut namar ka jingtad bad hiar dor palat jong baroh ki jait mar rep mar riang jongki. 

                         Sha ki thain nongkyndong,u synsar ne syrniam uba dei u mar rep uba ju kyrshan ia ka kamai kajih bad uba dei ruh u thymmei jong ka jingkamai  jakpoh jong ki nongrep, mynta u snem pat, ka dor jongu ka la hiar shaba palat.Lada die ia u ruh, kam mih shuh wat tang ka bai pynkhuid bad bai pom ia u..Lada khein lei sa ka bai kit bai bah na khlaw ne na bri,  ka jinglut ka ktah syndon (duhnong) wat  na pla(bai seng)jong ki..Bun ki nongrep synsar ki ong ba kim lah shuh wat ban kyrshan ne  phah skul ne buh skul ia la ki khun namar ka jinghiar dor palat u synsar mynta u snem.Wat ban pyndap ia ki jingdonkam ha ing ha sem ruh kim lah shuh namar ka jinghiar dor palat une u mar rep.             

U kwai ruh  uba ju biang bha ka dor man la u snem,hynrei mynta u snem pat,u hiar dor shaba palat.Ki nongrep kwai ki la ia ud bad kyrkaw namar ka dor  bai pynkhuid bad bai ot kwai ka rem bha  katba ka dor u kwai pat ka hiar palat haduh ba poi pynban sha ka jingduh nong ka jingrep kwai jongki mynta u snem.  

                                    Sa u tymmew ne u ‘Lakor ne u pathi ruh ka dor jongu mynta ka la hiar shaba palat.Ki mar rep aiu mynta kiba lah(kiew dor), la jan baroh ka dor ki mar rep ka la hiar sha wah(hiar dor palat /hiar dor sha trai) katba ki mar ki mata ba ki nongrep ki donkam pat ka dor ka kiew sha bneng(kiew dor palat). Hangno shuh u nongrep,u nongkyndong uba ju im da ka rep ka riang un dang im( survive).Lada kane ka ‘nemsniew jong ki nongrep kan dang iai bteng sa shisnem ar snem,ka pyrthei jong ki nongrep kan sa kut noh na kane ka pyrthei.      

          Kat kane ka apot,ka ‘nemsniew bad ka jingjynjar bad jingkordit ba ki nongrep ki ia kynduh mynta u snem, hynrei, ka sorkar MDA ha Meghalaya bad ka sorkar NDA ha Delhi pat jar jar wat tang shi kyntien ruh khlem pynpaw ei ei.Shaei kita ki party ieit ri ieit jaitbynriew ba ki pyrta tang ha ka aiom Elekshon ki ia jah? Balei ki ia sngap jar jar kat kane ka iap ka im jong ki nongrep bapli? Shaei kata ka Minimum Support Price(MSP) ba ka sorkar ka pynbang pynthiang ia ki nongrep bapli khamtam ha ka por Elekshon? Shaei kita ki Seng nongrep ba kin iarap lem ia ki nongrep bapli?Lada ym don ba iarap lem kumne,kan sa poi ka por ba,shisien ba  ka um ka la poi ha ryndang,kam slem shuh ba ki nongrep na kylleng sawdong kin sa ia khih hi noh bad kin sa wan syndon ban wan syndon ban wan iapthngan   shajan Secretariat ban paw pyrthei lem  ka jingiap thngan jongki ban ia kaba shu ia iap thngan ei mata madei  tang hapoh ing lajong.