Ki nonghikai skul bad kolej bym dei sorkar hynne ka sngi ki la pynlong ia ka jingiakhih pyrshah ia ka jingkuman u Symbud Myntri Rangbah ka jylla ba peit ia ka tnad pule puthi u Dr Roytre C Laloo da kaba deng lama iong ha baroh kawei ka jylla kynthup ka Khasi bad Garo Hills.
La iohi ba baroh ki nonghikai skul bad kolej ki la leit shim klas bad ka lama iong ba ka deng ha shadem ban pynpaw pyrshah ia ka jingleh mynthi ka sorkar ban khlem khot iakren watla ki la dep kyrpad kyrpon la bunsien.
Kane ka jingdeng lama iong ka dei ka sdang jong ka jingiakhih bad kan bud sa ka jingsangeh shim klas ban long ha ka 29 tarik bad ha ka 3 tarik ban shim shuti paidbah.
Hapoh ka lama jong ka Joint Action Committee of All Teachers’ Associations of Meghalaya (JACATAM), ki don 10 tylli ki seng jong ki nonghikai naduh ki lower primary haduh ki kolej ha kane ka jylla ki bym dei jong ka sorkar.
Haduh hynne ka sngi, na ka liang ki nonghikai kim pat ioh jingtip ei ei na ka sorkar ba kan khot iakren bad u Symbud Myntri Rangbah.
Hynrei kham mynshwa ka sorkar ka la khot iakrne ia ki bad ka Commissioner bad Secretary ka pule puthi hynrei ki nonghikai kim treh ban leit iakren namar ba ki kwah ban iakren beit bad u Symbud Myntri Rangbah ka jylla.
U Chairman ka JACATAM u Bah ED Nongsiang u la ong ba ki nonghikai kim kwah ban iakren bad ka shakri sorkar (Commissioner bad Secretary) namar ba man ba iakren, ym ju lah ban shim rai ei ei bad ka long tang ka jingleit shongkai bad dihsha. “Ym pat ioh jubab ei ei na ka sorkar bad namarkata, ka jingiakhih kan iaid beit shakhmat”, la ong u Bah Nongsiang.
Ha kajuh ka por, u la ong ba ka All Meghalaya Adhoc Lower Primary School Teachers Association ka la ai ia ka jingkyrshan kaba pura ia ka jingiakhih jong ka JACATAM.
Phi don ban ong eiei?