Sdang ia shut ki seng bhalang, na ka beh shnong ha Mawrong

Nongpoh, 10 Jylliew:
Tang na ka daw ka jingiashrut ktien hapdeng ki seng bhalang, ha Ri-Bhoi namar ka kam jong ka shnong Mawrong, hynne ka sngi ka RBYF 12 Shnong Circle ka la pynrem jur bad byrthen ruh ia ka jingtuklar bad mushlia palat jong ki ar tylli ki seng bhalang, kata ka ia CSWO (A) bad ia ka HNYF NR.
Katkum u Bah Ialam Lamarai, General Secretary ka RBYF, 12 Shnong Circle, u la ong bad kynnoh ia ka CSWO ba la ialam da ka Kong Agnes Kharshiing bad ia ka HNYF NR ba la ialam da u Bah A Jyrwa, kiba la iashah liang sha u Bah Selukos, uba la kynnoh ba u la shah beh shnong ha ka shnong Mawrong lem bad ka jingkynnoh jong u ba ki trai shnong bad ki bor shnong ki la kyntait bad beh shnong ia u bad ia ka iing ka sem baroh kawei.
Ka jingbitar jong ka RBYF halor kane ka long ruh ba ka jingmushlia kam shnong ka CSWO bad ka HNYF kaba kim shym la leit ban kynduh shuwa ia ki bor shnong, halor kane ka jingjia, hynrei ki la shu iashah liang pynban, da kaba iarap ia u Bah Selukos, uba la long ka dawbah jong ka jingktah ia ka imlang sahlang ha katei ka shnong. Lada kylli na ki briew katei ka thaiñ shaphang jong u, bun ki ban iathuh u long u briew uba kumno, namar u long u briew uba baroh ki paidbah katei ka thaiñ kim sngewtynnad ia ka jinglong jingim jong u, u la bynrap.
U Bah Ialam u la ong ruh ba lada ki dei shisha ki seng bhalang kiba kit ba bah ia ka khia ka shon jong kiwei pat ki nongshong shnong, ki la dei ban leit mih ban iakren bad ki bor shnong ban tip bad tih tynrai ia ka daw. Hynrei kitei ki seng bhalang, da kaba iashah liang, ki la nud ruh ban ujor da ka ejahar pyrshah ia ki katto katne ngut ki briew kiba dei na katei ka shnong bad kiba la shah kynnoh ba ki la pynshit ia katei ka jingjia.
U la ong shuh shuh ba kitei ki ar tylli ki seng bhalang ki dei ban weng noh ia katei ka jingmudui jong ki ha Umsning Police Oitpost, lym kumta na ka liang ka seng kam banse ban iaid shakhmat da kiwei pat ki lynti, kiba lah ban long da ki jingiakhih, namar kitei ki briew kiba shah ujor ejehar ki dei ruh ki dkhot bad nongialam ka RBYF na katei ka thaiñ, la byrthen tyngeh ka RBYF, 12 Shnong Circle.