Sdang biang ka NBCC ia ka jingker sainar shiah sha Huroi

Shillong: Ka National Border Construction Company (NBCC) ka la sdang biang ban bteng ia ka jingker sainar ha Huroi khappud bad ka Ri Bangladesh.

Lah ban pynkynmaw ba dang ha kine ki khyndiat bnai ba la dep ka KSU Narpuh Circle lem bad ki trai khyndew ki la leit pynsangeh ia ka jingker sainar namar ba katei ka company kam shym siew ia ka bai luksan (Compensation) sha ki trai jaka ba shah ktah pynjulor ki jingthung ha ka jingpyntrei ia katei ka project.

Hadien nangta u DC East Jaintia Hills, u la phah khot ia ki trai jaka ban wan mih sha ophis jong u. Ki trai jaka ryngkat bad ka seng ki la leit ban ia kynduh ia u DC ha kamra treikam jong u.

Haba ia kren, na ka liang u DC u la ong ba ka NBCC ka la dep siew ia ka bai luksan baroh, kumta ym lah shuh ban siew ar sien ia ka juh ka jaka. Hynrei na ka liang ki trai jaka ki pynpaw ka jinglyngngoh namar ma ki kim pat ioh satia wat tang shi anna ruh.

Katba u DC u la ong ia ki trai jaka kim donhok ban pynsangeh ia ka jingker sainar bad lada jia ba ki leh kumta, un phah shipai ban leh da kaba tyngeh. Hynrei na ka liang ki trai jaka ki la ong ba kin iai bteng ka jingpyrshah katba kim pat ioh ia ka hok.

Kumta, ki trai jaka bad ka KSU Huroi Unit myn hynnin ka sngi, haba ki la iohi ba ka company ka la sdang biang ban pyntrei ia ka kam, ki la leit mar mar ban pynsangeh ia ka jingpyntrei. Ki trai jaka ki la ong ki la ngiah ban leit mih shi leit mih sha ophis u DC ban kyrpad ia kajuh shi kajuh.