Sdang biang ka jingpyntrei ia ka jingkieng Kurliya

Jowai, 28 Iaiong:
Ka tnad PWD jong ka sorkar jylla ka la sdang biang ban pyntrei ia ka jingkieng Kurliya kaba pyniasoh ia ka Sahsniang bad ki shnong kaba don sha shilliang ka wah Myntang kiba kynthup ia ka Khat kasla bad Psiar nalor kiwei kiwei ki shnong Pnar kiba don ha Block I.
Ka tnad PWD bad u Kontraktor jong ka u la hap ban sangeh ia ka jingtrei ha u bnai Rym phang na ka daw ba ki pulit Assam ki la wan ban pynsangeh jubor ia ka jingtrei bad da ka jingshimkhia u DC ka WJH bad ka sorkar jylla hi, ka jingtrei ka la sdang naduh hynnin ka sngi ha ryngkat ka jingpahara ki pulit Battalion ka jylla.
Ia katei ka jingkieng la sdang ban trei bun bun snem mynshwa bad na ka daw ka jingbym shimkhia u Contractor ba rim, katei ka jingkieng ka la sahteng palat 10 snem bad hadien ba ka sorkar lyngba ka tnad PWD ka la ai biang ban pyntrei ia katei ka jingkieng sha uwei pat u Kontraktor, tang hadien shi taiew ba u la sdang, u la shah pynsangeh noh ha ki pulit Assam kiba la thmu ban klun jubor ia katei ka jaka da kaba tam pud ruh ia ka Psiar bad Khatkasla.