Shillong,6 Nohprah:
Hadien ba ki la shim ia ka rai ban pyni bor noh ia ka sorkar naduh mynta ka sngi, ki nongdie madan ha shi lynter ka surok bah G.S Road (Umsohsun) haduh Motphran ki la ieng ryntih bad ki la phriang ia ki tiar ki tar jong ki kumba ki la leh ha ka por myn-shuwa. Une u nongthoh-khubor u la iaid swait kylleng kitei ki jaka ba npeit hato katno ka jingpyni bor ki nongdie madan ka long.
Haduh ka por 4 baje janmiet la iohi ba ka tnad Municipal kam nud ban pyndik ia ki bad la iohi ba ki die sahuh sahai kumba ki leh mynshuwa bad ka shi lynter ka la khapngiah shoin kumba ka long mynshuwa. Ki la don bunbah ki longkmie longkpa kiba la phriang ia ki jain phong, ki patlun poh ki jaket, ki sopti bad kiwei pat ki mat, nangta la iohi ia ki khar die alumuri ba ki shong die khlem salia ha ki lynti iaid kjat kumba ki ju leh mynshuwa.
Une u nongthohkhubor u la ioh ruh ba ia kren bad kiba bun kitei ki nongdie madan ban twad jingmut aiu kin leh lada jia ba ka Municipal kan wan khynra kynsan bad kit ia ka mar jong ki , hynrei kitei ki la jubab ba kim salia shuh mynta namarba ki la tylli bad lada jia ba wan leh donbor kim salia wat ban ia iap ruh hapdeng madan.
La kylli na ki haduh katno por kin bteng ia katei ka kam die madan jong ki bad ki la jubab ba kin dangf iai bteng kumba juleh katba ka sorkar kam pat lah ban pyni ia ka jaka ba kin shong die, ki la ong ba lada kim leh kumtei kan ktah ia ka jakpoh jong ki namarba ki la im sngi da katei ka kam la bun snem mynta.
Kham mynshuwa ka la don ka jingkynnoh na ki nongdie madan ba ki nongtrei ka Municipal ki la bam ei ia ki momo ki , sikret jong ki hba ki wan ban khynra, une u nongthohkhubor u la kylli na ki hato ka don ne-em ka jingleh tohmet ia ki khamtam ki kynthei ha ka por ba wan khynra ki la ong ‘ap beit hangne bah, sa shu peit sa shiphang ar phang da ki wan, phin sa iohi hi aiu ki leh bad aiu ngin leh’ ki la ong.
Phi don ban ong eiei?