Sawa sur ha thain Civil bad thain Laitumkhrah

Shillong, 14 Rymphang:
Mynta ka janmiet, ioh sngew ia ka sur ba sawa jur ha ka surok ka thain Civil Hospital bad thain Laitumkhrah kaban pynshongshit ia ka lym pung South Asian Games. Dang shen, ka sorkar lyngba ka Meghalaya Control Pollution Board, ka la pynmih ia ka jing pynbna bym bit ban pynmih sur kaba heh namar ba ka ktah ia ka jingkoit jingkhiah bad, ka long pyrshah ia ka ain.
Ka president ka CSWO ka Kong Agnes Kharshiing kaba la ong ba ka jingpynsawa kaba jubor wat hajan Civil Hospital, Shillong ka long kaba sngew lyngngoh, kumno ka bor synshar district ka shah namar ba kan ktah ia ki nongpang ba don ha ka hospital.
“Ka jingsawa ka sur jingtem jingput ka long kaba khlain bor haduh katta haduh ba ngi ba sah shaduh ka Shillong Zcollege, la ioh sngew kumba don hajan”, la ong ka Kong Agnes.
Ka laong ba la ioh sngew ia kane ka sur, kaba neh haduh 9:30 baje mynmiet bad ka jingkylli ka long,kumno ka bor synshar district bad ki pulit ki shah ia kane, kaba ktah bad pynwit ia ki samla ba pule kot bad ia ki nongpang.
“Ka bor sorkar kam lah ban pyndonkam bakla kaban ktah ia kiwei pat ki paidbah”,la bynrap ka president ka CSWO.