Saw ngut shah sospon ki nongtrei khlaw KHADC na ka T.34 lak

Shillong, 30 Lber:
4 ngut ki nongtrei jong ka tnad khlaw ka KHADC ki la shah sospon na ka kam jong ki namar ka pisa kaba T.34,30,000 tyngka. Katei ka jingshah sospon ka la sdang nyngkong da ka jingsospon ia u Forest Chowkidar Cum Peon u Franklin Khymdeit ha ka 2 tarik u naiwieng, 2016 bad hadien pat sa 3 ngut ki ophisar kata u bah T.Saiborne-Chief Forest Officer, bah M Lyngdoh Deputy Chief Forest Officer bad bah Baniwell Lyngdoh Under Secretary sha ka Executive.
Kham ha shuwa ia kane, ka EM ba peit ia ka tnad khlaw ka KHADC ka kong Gracemary Kharpuri haba jubab ia ka jingkylli ha ka dorbar mang tyngka ka KHADC ka la kubur ba ka la don ka jingpyndonkam bakla ia ka pisa ba ka KHADC ka ioh bhah 50% na ka tnad khlaw bad ia kane ka la ong ba utei u Chowkidar ( Franklin Khymdeit) u la kubur ba u la pyndonkam bakla ia katei ka pisa bad ka la ong ruh ha katei ka por ba ka jingtohkit ka dang iaid bad ka la jan dep artad bad kan sa aiti sha ka Executive Committee.
Kham hadien la mih sa ka jingshah sospon ki 3 ngut ki ophisar kiba peit ia katei ka tnad, haba ia kren bad ka kong Grace ka la ong ba ka jingtohkit kaba nyngkong la dep ban aiti sha ka EC hynrei ka dang don sa kawei pat ka jingtohkit kaba dang iaid mynta bad khnang ba ka jingtohkit kan long kaba khuid la sospon noh ia ki 3 ngut ki ophisar.
Ia ka jingtohkit ba nyngkong la khlieh da u Joi9nt Secretary ka KHADC u bah D.G Syiemiong bad kaba-ar pat la khlieh da u bah E.L Myrten Additional Judge bad la ai por 3 bnai ban pyndep ia ka jingtohkit.