Saw bnai khlem tulop, syrtok ia ki nong trei ka JHADC

Jowai: Ki nong trei ka JHADC ki la ud bad sngewkhia halor ka jingbym shym la ioh tulop shuh la palat saw bnai mynta.
Kine ki bnai ki dei ki bnai ba donkam pisa bha ki kmie ki kpa namar ki hap ban siew bai admission, thied kot, uniform ia ki khun kiba dang shu dep ban pass ia ki exam jong ka MBoSE.
Ka jingduh tulup ki nong trei ka JHADC kumjuh ki MDC ka la jia na ka por sha ka por na ka daw ka jinghiran pisa bad kumba long mynta ka EC hapoh ka jingialam u ma Thombor Shiwat ka dang purshang ban wad ia ki lad ban ioh ia ka bhah jong ka na ka sorkar jylla na ka bynta ban ioh siew ia ka tulop ki nong trei jong ka JHADC naduh ka tulop ki MDC, ki Officers, ki driver bad ki peon.
Haba iakren bad u Deputy Chief Executive Member, u ma Lasky Rymbai u la ong ba ka pisa ban siew tulop sha ki nong trei jong ka Council ka la jan poi bad u la kyrmen ba ha une u bnai ka Office kan lah ban siew tulop ia ki nong trei jong ka.
Ka JHADC ka don ka jingkyrduh pisa bad kane ka la buh jingeh shi katdeI eh ia ka Executive Committee kaba mynta. Kawei pat ka jingeh ka long ka jingbun palat ki nong trei kaba la long palat ban ia ka jingdonkam ka Council.
Na kawei ka EC sha kawei pat ka thung briew thurmur ban ba jan kut ka san snem tang ban ioh jingmyntoi ha ka por Election bad kane ka jingthungkam thurmur ha JHADC ka la buh jingeh ia lade mynta kat haduh ba ka tulop ki nong trei ka la kot haduh palat 6 klur tyngka ha ka shi bnai, la iathuh ka tyllong khubor.