Sar ka khieshoh, suba ia ka Dengue Fever ha Baridua

Nongpoh, 03 Nailar:
Haduh 6 ngut ki nongpang na ka shnong Baridua la pynkit noh mar mar sha City Hospital Guahati, hadien ba ki bor pyniaid ka tnat ka koit ka khiah ha Ri Bhoi, ki la suba ba kitei ki 6 ngut ki don ia ka jingpang Dengue Fever ne ka jingpang kaba saphriang na ka jingdait u Kain pyrjong.
Ia kane la iathuh da ka tnat jong ka kiot ka khiah ha Ri Bhoi District, da kaba ong ba ki bor shnong ka Baridua ba hap hapoh ka Khanapara Police Station, hynnin ka sngi ki la wan ban iathuh shaphang jong kitei kiba la suba ba ki don ia ka jingpang Dengue Fever, hapoh ka ophis District Health a & Medical Officer, Nongpoh.
Ki bor shnong ka Baridua, ki la dep phah ruh ia ki kot ki sla sha ka ophis u DH&MO, Ri Bhoi, haba iadei bad kitei ki suba ba don ia katei ka jingpang, ha kajuh ka porn a ka liang ki bor shnong ka Baridua ki la kyrpad ruh ia ka ophis u DH&MO ba kin wanrah noh mar mar ia ki lad jingiada, khnang ba katei ka jingpang kan ym saphriang shuh sha kiwei pat.
Haba iadei bad kane na ka liang u Dr. S Lyngdoh, DH&MO ka Ri Bhoi Distrik, u la ong ba ia katei ka jingpang, ki briew kiba ioh iaka ka dei hadien ba ki la shah dait ha ki kynja Kain pyrjong ia kaba la tip kyrteng kum u ‘Aedes’.
Shuh shuh, u la ong ruh, ba ia kane ka jait jingpang lah ban sumar da kaba suk bad kata ka long da kaba ym ailad ia ki um ba kin lang ha ki shakiar iing bad iada ialade na kaba shah dait ha ki kain pyrjong, kumta haba iadei bad ha ka shnong Baridua na ka liang ka ophis u DH&MO kan sa pynlong ruh ia ka Awareness programme ha ka sngi Thohdieng ha Baridua, kaba long kum shibynta ban ai jinghikai ia ki paidbah ha katei ka shnong, u la bynrap.