Shillong: Ka la saphriang ha ki Whatsapp ba ka Meghalaya Public Service Commission ( MPSC) ka la pynmih ia ka resol jong ki samla kiba ia khun ia ki kam Junior Engineer Civil Grade I ha ka ophis jong ka Veterinary (CEW), Water Resource Department bad P.W.D. (R & B). La pyni ha katei ka resol ba la saphriang ba ki don haduh 87 ngut ki samla kiba la ioh kam bad la pyni ruh ia ka jingsoi jong u Chairman bad Secretary jong ka Commission.
Hynrei phewse hadien la ioh jingtip ba katei ka resol ka dei kaba la shu shna thok da ki briew bym ithuh, tang mar ia ioh jingtip ia kane ki bor ka MPSC mar mar ki la leit ban ujor sha ki pulit ban lap ia ki briew kiba donkti ban leh thok ia katei ka kam. Ka Secretary jong ka MPSC ka kong Wanrilin A.M Booth ka la ong ba katei ka dei ka kam thok bad ka la ong ba ka Commission haduh mynta ruh kam pat pynkhreh satia ia katei ka Resol ki Enjiniar, ka la ong ba kam don jingtip eiei shaphang kane bad ka la iathuh ba ka la ujor sha ki pulit ba kin tohkit bniah ia katei ka kam.