Sangsot ki thei armet ba duk, pat long kha khun ha Lawmali

Shillong, 26 Risaw:
Ka dei ka khubor kaba sngewsih ia ki thei armet kiba duk bad ka daw, ka long ba mynta hadien 20sngi ruh, ka Ganesh Das Hospital kam pat lah ban pdiang nong wan kha khyllung naduh ba ka kamra kha khyllung ka la shah bam ha ka ding dang shen. Ka jingshna ia ka kamra kha khyllung jong kane ka hospital kaba ju tip kum ka Lawmali hospital ka dang iaid mynta.
Namar kane ka jingjia pluh jong katei ka kamra, ki bor pyniaid ka hospital jong ka sorkar kham mynshwa, ki la pynbna paidbah ba la pynsangeh shwa ban pdiang ia ki nongwan kha khyllung ha katei ka hospital haduh ban dep pynbha pat ia ka.
“Ngi dang shna ia ka kamra ba la shah bam ha ka ding bad ka kam ka la iaid shaid shaid”, la ong ka thymmei khubor sorkar kane ka tnad.
Ka jingpyndep ia ka jingshna bad moramot ia kane ka kam kha khyllung kan sa shim por sa katto katne bad mar ia dep, yn sa pdiang noh ia ki nongwan kha khyllung, la ong ka thymmei khubor sorkar na kane ka tnad.
Hynrei ha kawei ka liang, la iathuh ia mynta ka don tang lai tylli ki jaka kha khyllung bad ka pynshem jingeh ia ki ban pdiang namar ka jingbym biang ka jaka.
Ha ka 6 tarik Risaw, por 5 baje [bteng sla 7]
janmiet ka hospital Ganesh Das ba seng ha u snem 1935 ha Lawmali ka la kem ding kynsan hadien ba u transformer ka MeCEL kaba don syndah kane ka hospital, u la bthei.
Kane ka hospital ka dei kaba bun kiba wan shah sumar bad wan kha khyllung ki dei na jaka nongkyndong namar ba ka dei jong ka sorkar.
Ha kane ka jingjia ka kamra kha khyllung ka la ing khong khait hynrei donbok ba ki nongpang ki la lait thaw na ka jingjia ba sngewsih hadien ba ki bor hospital ki la pynkynriah wut wut sha jaka ba lait na ka jingma.
Ha ka kamra kha khyllung don 6 tylli ki jaka kha.