Sangsot ki pulit ka 6th Battalion ba leit pahara elekshon sha West Bengal

Shillong: “Ngi la mih na la ka jong ka jylla ban leit duty Election sha West Bengal, ngi don haduh Hynniew (7) Company na ka 6th Battalion, hynrei ngi la im sangsot namar ki siew ia ngi tang T.150/- shi sngi, ban thied um ne ban bam ja ne”, la ong ka tyllong khubor na ki pulit katei ka Battalion kiba dang don haduh mynta sha West Bengal ban leit pahara Election Lok Sabha.
“Hadien ka 5th Scheduled Pay, ngi dei ban ioh T.600/- marwei, hynrei la siew ia ngi tang T.150/-. Ha ka por ba ki pulit jong ngi ki leit duty sha Chhattisgarh ki ioh T. 600/- shi sngi, balei pat la ai ia ngi hangne ha West Bengal tang T.150/- sngi, don aiu sha lyndet? Shano ki heh ki hain jong ngi”, la ong ka tyllong khubor kaba tikna.
Kitei ki pulit kiba leit duty ban pahara ia ka Election Lok Sabha sha West Bengal ki hap ban mad ia ki jingeh kiba bun rukom namar ki don ki jingjia kiba har rukom.
Bun na ki shipai jong katei ka Battalion ki la pynpaw ia ka jingsngewsih
“Ngi sngewsih bad ngi khuslai”, ki la ong.
Phasi u Havildar ka 6th Battalion
Uwei u Havildar jong katei ka Battalion u la phasi ia lade mynta ka sngi, ha ka jaka sah jong u ha kawei ka jaka kaba u don duty Election.
Utei u Havildar (Major kumba ki khot shane) u dei na ka jait bynriew Nepali uba la tip kyrteng kum u Havildar Vikram Lama uba shong ba sah ha Shillong. (dong aiu ym lah ban tip).
Haba pyrshang ban iakren ia ki heh pulit khamtam kiba dei na katei ka tnad ki la iathuh ba kim lah ban ong eiei namar ia ka Post Mortem ruh ym pat lah ban pyndep, yn pyndep lashai bad hadien kata kin sa wanrah ia ka met sha Shillong.
“Ngi ngim lah ban tip u don ha kano ka jaka namar ngi don jngai hynrei kane ka dei ka jingjia kaba tikna”, la ong ki pulit kiba don duty sha katei ka jylla.
“Ki ba haiing ki la wan, hynrei ki la kyrpad ba ym dei ba kan mih sha ki khubor namar ki lehrain” la ong uwei u heh pulit.
Ki pulit katei ka tnad shipai, ki la kynnoh ba dei na ka daw ka jingshah jynjar palat ba utei u paralok jong ki u la bthat jubor noh ia la ka jingim ba kordor ka jong u.