Sangsot ia kiba don ha ki nong kyndong

Bah Monarch Shabong

Haba don kino kino ki jingjia; kiba shem jingeh palat, ki dei ki nongkyndong bad ki jing sohsat, ha ki bun bun bnai ba ladep, ki kdew shai ia kitei ki jingshisha, ba ki briew kiba don ha sor, ki mad ia shi dana ka jingeh, ban ia kaba ki mad kito kiba don ha ki nongkyndong.

Haba iakhih ki seng bhalang, kiba ju sahkut lynti bad kiba phet rit mynsiem, ki dei ki nongkyndong, namar ba ki hap leit phai sha jngai sha la shnong, haba khang shnong ka sorkar, kiba nang sohsat, ki dei ki nongkyndong bad ka daw, ka long ba kim ioh jingtip kaba biang, nangta, kim don pisa ha kti, kim don ka bam ka dih bad bun bah ki jingdkoh kiba har rukom.

Haba julor ka pyrthei, lada dei na ka eriong erngit, ka lapbah lapsan, hangta ruh, ngi iohi, ba ki surok, ki kham sniew bun phew shah, ha ki nongkyndong, ki iing ki sem ki khyllem bad ki shlei mam, da ka um bad kitei ki jia khah khah bha ha ki nongkyndong.

Haba thut ka mariang, kum kitei ki jingjia; sa ka duh ding ilektrik, ka jingdkut ki surok, ki lynti ki syngkien bad ka leit ka wan, kaba bteng da ki bun taiew kynthih bad katei ka dei ha ki nongkyndong bad ha kum kitei ki por, ki mih sa ki jing shim kabu, ha ka jingkiew dor ki marbam mardih, ka jing kiewdor ki bai kali, ka jingkiew dor ka bai thang ding ilektrik bad kitei ki dei jingjia kiba khah khah.

Ym tang katta, ha kine ki sngi, ka sorkar ka kham shaniah, ia ki Bank ban ia ki paidbah bad hangta lei nang suhsat shuh, namar ba ki nongkyndong, ki hap leit wad bank, da ki bun kynta bad ynda la poi hajan Bank ruh, sa ka hap ieng lain, kaba da ki bun kynta shuh, ban leit shim ia ki pisa lajong.
Ki sorkar, ki ju wan, ki ju leit bad ki ju kren bha, halor ki lad ki lynti ban kyntiew ia ki nong kyndong; hynrei kitei ki kyntien, ki long tang ki jingkren tap eit miaw suda, katba ki jing shisha, ha ki kam kim iahap eiei ruh em bad la iohi pynban, ba ka jinglong jingman jong ka sor Shillong, ka iapher bak ly bak, lada iaid tang hapoh shi kynta, ban poi sha ki shnong bapher ka Ri Khasi Jaintia.

Ngi la ioh ia ka jylla rilum, la 48 snem kynthih; hynrei haba peit, ngi iohi, kumba ki kam pynroi, ki satah beit hajuh, katba lada ngi jam tang khyndiat ha ki tyngkhap ka sor Shillong, ngin iohi, ba ki briew jongngi, ki dang sahkut lyngkrang, ha kiba bun bah ki liang.