Sangeh trei ki nonghikai ka Sacret Heart

Shillong, 10 Iaiong:
Ki nonghikai skul ka Sacred Heart Boys Higher Secondary School, Mawlai ki la pynlong ia ka jingsahngeh treikam ba shiteng sngi hadien ba u Principal jong kane ka skul u la pyndik biang ia ki da kaba pynslem khnang ia ka tulop jong ki nonghikai.
U Secretary ka Khasi Jaintia Deficit School Teachers Association (KJDSTA) u bah G Kharmujai u la ong ba une u Principal kane ka skul ym tang ba u pynslem tang ia ka tulop hynrei u la kyntait ruh ban ai ia ka pasbuk jong ki nonghikai  kiba thmu ban sei ia ka CPF kaba ki la kynshew.
U la ong ba don ruh napdeng ki nonghikai ki bym pat ioh ia ka tulop jong u bnai Rymphang 2015.
Kum kane ka jingjia la ju jia man ka por ba ki nonghikai ki ju shem jingeh hynrei dei tad naduh u bnai Lber 2015 ba ki nonghikai ki la hap ban dawa tyngeh ia la ka hok tad haduh ba kin da ioh ia ka tulop, la ong u bah Kharmujai.
Nalor kane ka jingpyndik ia ka tulop ki nonghikai, une u Principal man ba ki nonghikai bad ki khynnah skul ki ju leit ban iakynduh ia u por ba donkam hynrei kim shu lah ban iakynduh, la ong shuh shuh u Secretary ka KJDSTA.
Na ka liang ki nonghikai kila rai ba lada kum kane ka jingjia ka dang iai jia man kapor, kim banse ban iaid shakhmat da kaba bteng ia ka jingiakhih jong ki. Lah ban kdew ba kham mynshwa ki nonghikai ka Sacred Heart Boys Higher Secondary School Mawlai ki hap nguh hap dem ia u Principal ka skul lada ki kwah ban ioh tulop.
Kane ka jingpynslem tulop kam pat ju jia ha ki samoi treikam jong kiwei pat ki Principal hynrei dei tang hapoh ka jinglong Principal jong une uba mynta ba ki nonghikai kim shym la ioh ia ka tulop.
Kawei pat ka daw kaba pynbitar shuh shuh ia kiba bun ki nonghikai ka long ba ki shem ba don ka jingleh shiliang khmat ha kaba ia kito ki nonghikai kiba u sngewieit sngew iadei u ai ia ka tulop.