Sangeh trei kam ki doktor ba pyrshah ain thymmai

New Delhi: Ka jing trei kam ha ki hospital sorkar, ba kynthup ia ka RML bad ka AIIMS ha Delhi, kan ktah jur shibun eh, namar ba ki doktor, ki la byrngem ba kin sangeh trei kam khlem pynkut por, kum ka jing pyrshah jongki, ia ka National Medical Commission (NMC) Bill.

Katei ka bill, ka thmu ban bujli ia ka bill, kaba la don lypa ka Medical Council of India (MCI) bad la sngewthuh ba ia katei ka bill, yn leit rah ha Rajya Sabbha ha ka sngi Palei.
“Ki Resident doctor, kin sangeh ban sumar ia ki nongpang kiba wan na shabar bad kumjuh ha ki jaka sumar ia kiba shitom jur bad wat ha ki ICU ruh kumjuh, kum ka dak jong ka jing pyrshah ha ka Sngi Paei bad katei ka jingiakhih, kan iai bteng, lada ia katei ka bill, yn leit rah ha Rajya Sabbha” ong U Dr Sumedh Sandanshiv, president, Federation of Resident Doctors’ Association (FORDA), ha kaba u ong ba katei ka ain, ka dei kaba pyrshah ia ki samla pule kiba duk, kaba pyrshah ia ki samla kiba dang pule bad ka dei ruh ka bym iahap ha ka rukom trei kam jong ka ri synshar paidbah.
Ki Resident Doctors’ Association (RDA) jong ka AIIMS, ki la ai jingtip, halor katei ka jingthmu iakhih jongki bad ki doktor, ki la ia deng lama iong, kum ka dak jong ka jingsngew pyrshah ia katei ka bill.