Sangeh ki nongkhaii dewiong ka thain Shallang

Nongstoiñ, 7 Rymphang:
Ki nongkhaii dew-iong ka thain Shallang ha ryngkat ka Joint Action Committe (JAC) Shallang Area, kaba kynthup lang ia ki seng bapher bapher naduh ki Truck Owner, Land Owner, Nokma Association, Lyngngam Indegenious Federation (LIF), Hima Nongstoin Land Owner Coal Trader & Producer Association Shallang Unit, ha ka sngi nyngkong jong ka taiew ki la shim ia ka rai ban nym phah shuh ia ki trok kit dewiong ban iaid lyngba na ka surok Riangdo-Athiabari, namar ka jingbuh jong ka sorkar Jylla ia ki ar tylli ki jaka thew dewiong (Weigh Bridge) ha katei ka thain.
Ia katei ka rai ka JAC ka la shim ha ka jingialang paidbah kaba la long ha katei ka sngi ha Shallang bad ha ka sngi kaba bud kata ha ka sngi ba ar jong ka taiew katei ka rai jong ka JAC ka la treikam ha katei ka thain bad na ka liang jong u nongthoh khubor haba ioh jingtip halor katei ka jingjia u la pyrshang ban hiar sha katei ka thain ha kaba la lap ruh ba baroh ki trok kit dewiong kila phai khongpong noh na ka surok Riangdo-Athiabari bad hiar arsut noh sha ka surok Shallang-Nongshram-Denaidubi.
Haba pyrshang ban iakren bad ia ki nongialam lem bad ki dkhot jong katei ka JAC, ki nongialam jong ka JAC ki la pynpaw da kaba ki ong ba katei ka rai ba la shim da ka JAC kan treikam beit tad haduh ba ka sorkar Jylla kam pat lah ban pynshai halor ka jingdon jong kitei ki ar tylli ki jaka thew dewiong ha ka surok Riangdo-Athiabari.
Ym tang kata kitei ki nongialam ka JAC, ki la dawa ruh ba ka sorkar ka dei ban buh tang kawei ka jaka thew dewiong ha katei ka surok kumba long lem ha kiwei kiwei ki jaka hapoh ka jylla bad kila ong shuh shuh ba katei ka jaka thew kadei ruh ban don sharum ka surok Riangdo-Athiabari, bad kaba kham bha shuh shuh ka long ba lada katei ka jaka thew dewiong kan don ha shnong Athiabari namar ba katei ka thain kala dei ka khappud bad ka jylla Assam bad nalor kata ba kadei ruh artad ka jaka ruh jaka mih ki briew kiba nabar.
“Ka jingdon ar tylli kitei ki jaka thew dewiong tang ha kajuh ka shnong kala wanrah ia ka jingeh kaba khraw ia ki nongkhaii dewiong jong ka thain namar ka la ktah palat ia ka pisa pilain tang ha ka bai lynti namar ba ka jingsiew ia ki khajna bapher bapher sha ka sorkar bad kiwei kiwei de kala bun lypa bad tang ha katei ka surok na Shallang shaduh Athiabari ka jinglut kala bun palat bad na ka liang jong ngi ngim banse ban hap shim noh da katei ka rai tad haduh ba ka sorkar kan buh noh tang kawei ka jaka thew dewiong ha surok Riangdo-Athiabari” ong u secretary ka JAC u bah Robert Sohbar.