Sangeh ka KHADC ban siew bai bam tymmen sha ki MDC barim

Shillong, 21 Jylliew:
Hadien ba ka la siew T.54,47,515 lak tyngka kum ka bai tym men sha ki MDC barim jong ka mynta ka KHADC ka la sangeh noh shuwa ban siew bai bam tymmen sha ki MDC barim. Ia kane la jubab u bah Pynshngaiñ N Syiem ia ka jingkylli ba la wanrah da ka kong Rona Khymdeit, MDC ka UDP na Nongpoh kaba la buh jingkylli ha ka dorbar kaba la long mynta ka sngi. Ka kong Rona ka la kylli haduh mynta katno ka KHADC ka la pynlut pisa ban siew bai bam tymmen (Pension) sha ki MDC barim ka jubab ka long T.54,47,515 lak tyngka. Ka la kylli biang hato ia katei ka pension la siew sha baroh ki MDC ba la shongthait u CEM u la jubab ‘ho,oid’ katkum ka section KHAD (Members Pension) Act, 2002. U CEM u la ong ba katei ka aiñ ia ka bai bam tymmen ki MDC barim ka don ka jingiatyngkhuh ha kaba ka section 1B ka ong ba yn siew bai bamtymmen tang sha kito ki MDC kiba shah jied naduh ka 15 tarik u lber, 1999 katba ka section 3 pat ka ong hap ban siew T.5000 tyngka shibnai sha baroh ki MDC barim.
Ka kong Rona ka la kylli biang hato haduh mynta ka KHADC ka dang bteng ia ka jingsiew tulop, u CEM u la jubab ba la pynsangeh noh shuwa naba ka KHADC ka dang bishar bniah ia katei ka kam kaba bym pat lah ban pyndep haduh mynta ruh. Katba u MDC ka UDP na Shella Konstitwensi u bah Teiñwell Dkhar u la ong ba ka KHADC ka dei ban shimkhia bad ban thawlad ban pynioh bai bam tymmen biang ia ki MDC barim naba kiba bun ki MDC barim ki ju pynsngew sha u ruh ba un iarap lem ban pynkren ha ing dorbar ia katei ka kam. U bah Teiñ u la ong ruh ba ym tang kitei ki MDC kiba rim kiba shem jingeh hynrei wat ki MDC ba mynta ruh shisien ka sngi kin kylla MDC barim naba kim lah ban tip haduh katno kin shongsah ha ka jaka ba ki shong mynta.