Sangeh ka kdew kti, iatylli kum ka jaidbynriew, ong u heh HYC

Nongpoh:Haba ai jing kren ha ka sngi kaba la pynskhem ia ki nong kitkam ba thymmai ka HYC Nongpoh Circle, u Samla Roykupar Synrem General Secretary ka HYC Sengkmie, u la kyntu ia la ki jong ki dkhot, ba kin sangeh noh ha ka ban kdew kti ia kiwei, hynrei ki dei ban long kiba iatylli, khnang ba kiwei ki burom ia ka jaidbynriew.

Utei u nong ialam ka HYC, u la kren diaw ruh halor ka jingnangbun kiba la pharia bad pynjot pyn pra ia ka jaidbyn riew, nalor ba ka dei ka jaidbynriew kaba dang duna paidbah, kumta lada ym don sa ka jingiatylli, ka jingma kaba khraw ka ap ia ka jaidbynriew.

U la kyntu ruh ia ki dkhot ka HYC Nongpoh Circle, ba ki dei ban iatreilang ba ki bor shnong bor thaw, khamtam eh ha kaba kum kane ka por, ba bun na ki samla ki la ngop ha ki kam dih drok, kumta na ka bynta ban rat dyngkhong ia u drok, ka donkam ban iashimkhia lang da baroh bad ba ki samla kin lait na ka jingjot.
Kiba la donlang ha katei ka sngi, ki kynthup ia u Samla Hercules Suting President ka Ri Bhoi, Tony Shylla General Secretary, nangta u Bah Succesfull Lyngdoh, Chairman ka Nongpoh Town Committee, Bah Vicky Syngkli Rangbah Shnong Iewmawlong lem bad kiwei.

Ki nongialam ka HYC Nongpoh Circle, kiba la shah pynskhem ha katei ka sngi, ki kynthup ia u Samla Tony Shylla kum u President, u Samla Richard Diengdoh, Wolstar Rani kum ki Vice President, u Nicky Nongsiej kum u General Secretary lem bad kiwei.