Sangeh jingialang ki nonghikai JACATAM, ba hun jingiakren

Shillong, 24 K’lyngkot:
Ka jingialang jong ki nonghikai hapoh ka lama ka Joint Action Committee of All Teachers Association of Meghalaya (JACATAM) ba la pynkhreh ban pynlong ha ka 29 tarik na ka bytnta ban pynkhreh ia ki jingia khih, la pynsangeh shwa hadien ba ki la ioh ka jingiakren kaba hun mynta ka sngi bad ka sorkar.
U Publicity Secretary jong ka JACATAM u Babu Kular Khongjirem u la ong ba ka jingiakren hapdeng ki nongialam ka JACATAM bad u Director of School Education and Literacy (DSEL) u Am brose CH Marak halor ka jingshimti noh ia ka kam hikai (provincialisation), ka long kaba sngew tynnad.
“Ka jingiakren ka long kaba sngew tynnad, ha kaba u director u la pynsngew bad iathuh ia ki kam ba ka sorkar ka la leh ha kaba iadei bad ka jingdawa jong ki nonghikai ban shimti noh ka sorkar ia ki kam hikai ha kane ka jylla”, la ong Babu Khongjirem.
“Namar ba ka jingiakren ka long kaba sngew tynnad, ia ka jingialang jong ka JACATAM kaba la buh ban long ha ka 29 tarik Kyllalyngkot ban iakren ban shim ia ka lynti jingiakhih, la pynsangeh noh shwa”, la ong u Babu Khongjirem.
Katkum ka jingiathuh jong u Babu Khongjirem,u director ka DSEL u la iathuh ba ka sorkar ka la pynkhreh shaid shaid ia ki kam ha kaba iadei ban shimti ia ki kam hikai. “U director u la iathuh ia ngi, ba un leit wad jingtipbniah shwa sha kiwei ki jylla ka ri kiba la pyntreikam ia ka provincialisation ne shimti ia ka kam hikai”, la iathuh u Babu Khongjirem bad bynrap, ba un sa khot biang ia ki nonghikai ban iakren ha u bnai Lber hadien ba la ioh ia ka jingtip kaba bniah na kiwei ki jylla.
Ha kajuh ka por, u la iathuh ha kaba iadei bad ka jingpynbna jong ka sorkar ban shimti (provincia lisation) ia ki skul bym dei ba pyniaid da ki niam, ki nonghikai ki la pynsngew ba lada ka leh ha kane ka rukom ka long kumba leh shiliang. Halor ka jingkwah ka sorkar ban shimti ia ki skul, ki nonghikai kim pyrshah hynrei kan shong pat ha ka mon jong ki bor pyniaid skul ban pdiang ne em ia kane ka jingkwah ka sorkar, namar ba ka jingdawa jong ki nonghikai ka long beit ban shimti tang ia ki kam nonghikai.
Ha kane ka jingiakynduh, ki nonghikai ki la dawa ruh na ka sorkar ba ka dei ban pynjlan ia ka rta shong thait na ka 60 sha ka 65 snem kumba leh ia ki nonghikai unibersiti da ka sorkar pdeng, kaba la pynjlan sha ka 65 snem ia ka rta shongthait ia ki nonghikai.