Sangeh iakhih shwa ka JACATAM ba jan ka 100 percent

Shillong, 19 Iaiong:
Ka seng ki nonghikai JACATAM ka la rai ban sangeh shwa ban pynlong ia ka jingiakhih, kaba la thmu ban leh lashai namar ba ki la sngew jan ban ioh noh ia ka jingpynkiew tulop kaba 100 percent.
Kane ka rai jong ka JACATAM ban sangeh iakhih shwa, ka long hadien ba ki la iakynduh hynnin ka sngi ia u Commissioner Secretary ka tnad pule puthi u Bah Donald P Wahlang uba la pyntip ha ki nonghikai ba u la dep wan iakynduh bad ki ophisar ka Human Resources Development (HDR) ha Delhi bad ruh la iakren bad u Myntri Rangbah ka jylla u Dr Mukul Sangma mynshi sngi halor ka jingpynkiew tulop 100 percent ia ki nonghikai adhoc.
Ka JACATAM ka la iakynduh ruh ia ka Kong R V Suchiang kaba dei ka cabinet secretaty ba peit ia ka Finance ba kan pynsted ia ki kam.
Ka seng kan leit iakynduh ruh ia u Myntri Rangbah lane ia ka myntri tnad pule puthi ha kine ki sngi. Lada ka sorkar kam jubab kloi, ka JACATAM kam banse ban sdang biang ia ka jingiakhih.