Sangeh iakhih ki nongtrei ka MTC, ba kular T.90lak

Shillong, 05 K’lyngkot:
Ki nongtrei ka Meghalaya Transport Corporation (MTC) ki la rai ban sangeh noh shwa ia ka jingiakhih jongki, hadien ba ka bor pyniaid jong kane ka tnad pyniaid kali ka sorkar jylla, ka la rai ban pynlait noh hi lashai ne lashi sngi ia ka pisa kaba T. 90 lak ban siew ia ka tulop kaba shi bnai jongki.
Haduh mynta kine ki nongtrei ki la sah tulop lai bnai na ka san bnai hadien ba ki la iakhih bad sa kane kaba la kular ka sorkar ban pynlait T. 90 lak, kan long sa shi bnai.
Haba kren mynta ka sngi sha ki nongthoh khubor, u secretary ka Meghalaya Transport Corporation Workers Union (MTCWU), u Bah K Rumnong hadien ba la iakren bad ka Managing director ka kong A Nikhla, u la ong, “Ngi la rai ban sangeh noh ia ka jingiakhih hadien ba ka bor pyniaid jong ka MTC, ka la kular ban pynlait noh sa T.90 lak ban siew ia ka tulop jong ki nongtrei”.
“Na ka liang ka bor pyniaid ka la ong ba lada ka don pisa kan siew noh hi mynta bad ka don T.90 lak kaban iakren bad u Myntri Rangbah bad kan sa phah ia ka jingphah lashai ka sngi hi, ban ai noh ia ka tulop sa shi bnai”, la ong u Bah Rumnong.
U la ong ba ka bor pyniaid ka MTC ka la ong ruh ba kan pynlait sa 20 percent na ka Economy cut, ban bynrap sha ka tulop bad kan sa pan sa ka jingiarap na ka sorkar ban siew ia ka CPF kaba dang sah.
“Lada ngim sangeh ia ka jingiakhih, kumno kin pyndep ia kane ka jingdawa jong ngi bad ngi la pynsngewthuh ia ki nongtrei halor kane”, la ong u Bah Rumnong.