Sangeh iakhih ki nongbylla sngi ka tnad ka koit ka khiah

Nongpoh 23, Naiwieng:
Ki nongtrei ka tnad ka koit ka khiah kiba ha Ri Bhoi District, ha kane ka sngi Thohdieng ki la rai ban pynkut noh ia ka jingiakhih jong ki bad ban bteng biang ia ka jingshakri.
Ki nongtrei bylla sngi jong ka tnat ka koit ka khiah, ki la shim ia ka rai ban sangeh leit trei namar ka jingbym ioh ia ki bainong trei jong ki kaba la palat ia ka 8 bnai eiei bad ruh kane ka jingpep trei jong ki kan pynbor ruh ia ki bor sorkar khamtam ka tnat DHS ba kan pynlait noh mardor ia ki bainong trei jong ki, kine ki nongtrei casual jong ka Ri Bhoi District kiba trei ha ki jaka sumar pang bapher bapher ki don haduh kumba 98 ngut eiei. U Bah S Thangkhiew u chairman bad u Bah K.M Sylliang secretary jong ka kynhun nongbylla sngi u la iathuh ba watla ka sorkar kam shym la sngap satia ia ka jingdawa jong ki ia la ka hok k ka bainong trei hynrei kum ki nongtrei jong ki jaka sumar bapher bapher hapoh ka district ki la shim ia ka rai ban leit bteng biang ia la ka jingshakri sha u paidbah da kaba yn leit bteng biang ia ka kam jong ki ha ka district.“Kane ka rai jong ngi kum ki nongtrei bylla hapoh ki tnat jong ka Koit ka Khiah, ka la long halor ka nongrim, ba kum ki para briew ban ai ia ka jingshakri kaba paka sha ki paidbah khamtam kito kiba pang ba shitom kiba phah sumar ha ki jaka sumar bapher bapher, da kawei ka jingmut watla wat kim pat ioh ia ka siew hynrei kin bteng ban shakri bad ban len lade na ka bynta ka bha ka miat bad ka jingdonkam jong ki”, ong kine ki nongialam jong ki nongbylla sngi.Ki la ong ba watla ki la hap ban mad jingeh kaba khraw ha kaban pyndap pynbiang ia ki jingdonkam jong ki ha kaban bsa ia la ka ing ka sem bad ruh ban siew ban tda ia ki jingdonkam kum ki baiskul jong ki khun jong ki, na ka liang kine ki casual worker ki la ieng beit triang ban nym kynran dien bad ban ieng skhem ha kaban nang ai ia ka jingshakri kaba paka watla ki bor sorkar kim suidniew ia ka jinglen lade jong ki bad ruh ba ka sorkar ka hun ban shu sngap mynthi halor ka jingdonkam kaba kyrkieh jong ki ban ioh ia ka hok kaba ki deihok ban ioh katkum ka jingtrei jingktah kaba khlem da thew da woh.