Sangeh die doh masi

Ngim shym sngew pyrshah eiei, haba ki khang ki nongot doh ia ka jingdie doh masi ha ki khyndiat sngi ba ladep, namar ba ki don ia ka jingmut kaba beit, kaba khuid bad kata ka long ba ki kwah ban ioh ia ka dohmet shalade, lane ban ai da kaba kyntait sha ki nongkhaii masi sha Bangladesh (lada ym lah ban khang noh shi syndon ruh). dei tang katta, ki kwah ruh ban rai ma ki, ia ka dor die bad ba kim dei ban rai ki nongdie tuh sha Bangladesh.
Hynrei kam dei shisha kaba suk, namar ba mangi ki nongthied doh ruh, ngi ju kwah hi, ia ka doh kaba bha, kaba ibang, namar ngi la dep siew pisa katba kum ka jingbuh dor ki nongdie, hynrei ngi ju lap, ba ynda la don ha ka jingthew tarajur, ka ju long ka jingmlien ki nongdie, ba lada phi pan shi kilo, kin ot na kaba phi mut shiteng kilo eiei bad kaba sah nangta, kin peit shadiang shamon ban wad ia ki dohtam bad kin pyndap ia katei ka shi kilo.
Katei ka dei ka buit jong u nongdie, lada ia ka masi kaba la pyniap bad mynta lada dei ia kaba dang im ruh kumjuh bad katei ka dei ka bynta jong ka synshar, ha kaba ain kaba la dawa da ki nongdie doh masi, ka iapher, na kaei kaba ki pyn treikam, sa ki nongkhaii tuh masi.
Mynta ka la mih ka jing iakren, ba ki nongdie doh masi, haba ki leit talasi ia ki masi kiba kit sha Bangladesh, hynrei ki shah kynnoh ba ki leit dawa pisa bad ki kylla nonglute bad katei ka dei ka ain jong kine ki sngi.
Ki nongdie doh masi, ki don shibun ki jingmut, na ka bynta ban iai bteng ia ka jing sangeh die doh, nangta ban kynriah ia ka iew na Khanapara sha Byrnihat bad lehse ki don ruh sa shibun kiwei pat ki jingmut jing pyrkhat, hynrei kaba tieng ka long ba ioh lehse, kin shah ngiat pynban shadien pa shadien bad ba ka jingmut jing pyrkhat jongki, ka lah ban nym trei kam satia.
Ka seng ki nongdie doh, kam dei ka seng niam lane kam dei ruh ka sengbhalang, hynrei ka dei ka seng jong ki nongkhaii bad lada u nong ot doh, u iai bteng ban sangeh da ki bnai, kumta un hap ban phai sha ka die dohsniang, doh syiar lane wat ban khaii masi lem noh ialade sha Bangladesh bad ngi dei ban sngewthuh ba ka khaii tuh, kam dei kaba suk ban pynduh, ha kaba wat ki BSF ruh kim lah. [rms]