Sangeh biang ka jingpyntrei ia ka jingkieng Kurliya ha wah Myntang

Jowai, 25 Naitung:
Ka jingkieng Kurliya kaba la tei halor ka wah Myntang na ka bynta ban pyniasoh ia ka West Jaintia Hills bad ka shnong Khatkasla, Psiar bad kiwei kiwei de ki shnong kiba don hapdeng ka jingiakhajia pud bad ki ar jylla, ka Assam bad Meghalaya ka la sangeh biang.
Na ka por sha ka por ki Pulit na Assam ki pyndik bha halor katei ka jingpyntrei iaka jingkieng. Ha u Bnai Lber une u snem ki Pulit Assam ki la khang ia u Kontraktor ban pyndep ia katei ka jingkieng kaba la sdang naduh u snem 2005, hynrei hadien ba ki ar sorkar ki la iakren, ka jingtrei ka la iaid biang shakhmat.
Ha kine ki khyndiat sngi pat, ka jingsangeh ban trei ia katei ka jingkieng kaba donkam tam ia ki paid Khasi Pnar kiba shong basah sha thain Block I, kam dei shuh na ki Pulit Assam, hynrei na ka daw ba ka sorkar Meghalaya lyngba ka tnad PWD kam shym la siew ia ka Running Bill jong u Contractor, u ma Pyrkhat Hinge.
“Ka jingtrei ka la sangeh bad ka daw ka long namar ba u Contractor um shym la ioh ia ka Running Bill”, la iathuh ka khubor na uwei na ki Rangbah Shnong katei ka thain.
“Ngi donkam bha ia katei ka jingkieng bad ngi kyrpad ia ka sorkar ba kan pyllait noh ia ka bill jong u Contractor khnang ba ka jingtrei kan iaid shakhmat bad ban myntoi ki paidbah ka thain”, u la bynrap.