Sangeh ban pyn saphriang, ia ka dur bad kyrteng U Jeffreson, um dei u kpa jong ki arngut ki hep rit, ba shah pyniap, ong ki pulit

Shillong:Hadien ka jing saphriang ka dur bad ka kyrteng ha ki social media jong uwei u sam la u ba tip kyrteng kum u Jeffreson Jana, uba la shah kynnoh ba u dei u ba donkti ban pyniap ia ki ar ngut ki heprit ha Nongrah Nonglum; mynta ka sngi na ka liang ki pulit ki la pynshai,u briew u ba la suba ba don kti ban pyniap ia kine ki ar ngut ki heprit u dei u bah Jeofreeson Jana, ym u bah Jeffreson Jana.

Une u pulit u la iathuh”Ha ka jingshi sha ka kyrteng jong u briew u ba la ioh ban kem ha ka jing suba ba u don kti ban pyniap ia ki ar ngut ki heprit ka dei u bah Jeofreeson Jana, ym u bah Jeffreson Jana”.
“U bah Jeffreson Jana u dei u para jong u ba la shah kem bad ka jia ba la mih ka kyrteng Jeffreson Jana, ki briew ki la shim ia ka dur jong une u samla na ki social bad pynsaphriang ia kane, da ka ba kynnoh ba u dei u ba donkti ban pyniap ia ki arngut ki khun jong u” la ong u ne u pulit.

Na ka liang ki pulit ki la buh ka jingkyrpad ba khlem da tip ia ka jingshisha ki briew kim dei ban pynsaphriang ia ka khubor bym don ka jingshisha, namar kane ka long kaba sngewsih ban iohi ba kum kane ka khubor ka bym don ka jingshisha ba kin saphriang bad pynbud man ia u samla uba khlem don kti eiei ha kano kano ka kam bym man.
Ha kaba ia dei bad u bah Jeofreeson Jana, u ba la suba ba u donkti ban bthat jubor ia ka jingim ki ar ngut ki khun ba dang rit jong u, ki pulit ki la iathuh ba ka jingtohkit ka dang iaid shakhmat.

“Ha ka jingtohkit, ki pulit ki la iathuh ba u bah Jeofreeson Jana, u la phla ba u donkti ban pyniap ia ki khun jong u bad u la pynpaw ruh ba um shem la don daw eiei ia ki bad ma u ruh um shem la sngewthuh balei u la shim ia ka jingim jong ki” la iathuh une u pulit.
Lah ban kdew hangne ba ki pulit ka Rynjah Police station ha ka sngi ba ar, ki la leit ban shim ia ka met jong ki ar ngut ki heprit kiba dang hapoh ka 4 snem ka rta, na kawei ka khlaw ka ba don hajan ka shnong Nongrah Nonglum.

Kine ki khynnah rit ki la mih na la ing ban leit kai bad u kpa jong ki, u ba la tip kyrteng u bah Jeofreeson Jana ha ka janmiet jong ka sngi nyngkong, hynrei naduh kane ka por hi kine ki heprit kim shem la wan phai ingshuh bad dei ha ka step ba bud ki la lap ia ka met jong ki.
Ha ka janmiet jong ka sngi babud hadien ba la ioh ia ka met iap kine ki khynnah rit, la ioh kem noh ha ka por janmiet ia u bah Jeofreeson Jana, ha kaba la kem na ing sah jong u kaba don ha Nongrah Nonglum.