“Sangeh ai wai ing-dukan sha ki bar jylla”

Shillong,30 Risaw:
Ka kong Teilinia Thangkhiew ka MDC ka Mylliem haba ia snohkti lang ban kyrshan halor ka mat ia kren ba la wanrah da u MDC ka Sohra u Bah Titos Chyne, ha kaba idei bad ka jingwan rung kyrthep ki briew kiba na bar sha kane ka jylla, ka la ong ba ki Khasi ki dei ban sangeh noh shisyndon ka ai wai ing ai wai dukan sha ki bar jylla. “Sangeh noh ka aiwai ing, ka ai wai dukan sha ki bar jylla, wat kwah ia ka myntoi kaba mynta, hynrei peit ia ka pateng bad ka lawei ban wan ka jaitbynriew” ong ka kong Teilinia. Haba kren halor ka jingbun palat ki bar jylla kiba la wanlong trai shnong ha kane ka jylla ka kong Teilinia ka la pynpaw ka jingsngewkhia kaba khraw ha kaba ka la ong ba haba leit sha Khyndailad sha Iewduh la iohi ba ka jingdon ki bar jylla ka khambun ban ia ki trai muluk, “Leit sha Khyndailad , Iewduh , ieng na jrong bad peit shapoh, niew katno ki khlieh briew kiba dei ki trai jylla” ong ka kong Teilinia kaba la kynthoh ruh khyndiat halor ka ILP kaba ki sengbhalang ki dang dawa. Ka la ong ba wat la ka mat ILP kam dei ka mat ban ia kren hapoh District Council hynrei ka dei pat ka jaka ban iatai ia ka iap ka im jong ka jaitbynriew.