![](https://www.urupang.com/wp-content/uploads/2024/03/DSC00677-2.jpg)
Shillong:U MLA barim ka Mawlai uba dei ruh u nongialam ka seng NPP, u bah Embhahlang Syiemlieh ula ther ia ki nongialam ka Voice of the People Party VPP halor ka jingpyndonkam ia ka ktien na Bible ha ki rynsan politik, ban ialam bakla ia ki paidbah na bynta ka jingmyntoi shimet.
Haba kren ha ka jingialang ki nongkitkam ka NPP Mylliem Block mynta ka sngi, u bah Embhah ula ong ba la ju iohi ha ki rynsan Social media ba ki nongialam ka VPP ki la pyndonkam ia ka ktien u Blei bad kane kam long kaba dei ban pyndonkam ia ka jingmyntoi ha ka sain pyrthei.
“Nga iohi ha social media, ki nongialam ka seng sain pyrthei (VPP) katba shaba leit, lada kim kren ia ka ktien u Blei, kim nang eiei ban kren, hynrei kynmaw ha ka shithi kaba ar sha ki nong Korin ka ong, u Paul u ong, wat pynlong mar khaïi ia ka ktien u Blei ia ka jingmyntoi shimet ha kam sain pyrthei namar kane ka long pyrshah ia ka mon jong u Blei”, la ong u bah Embhahlang.
Ha kajuh ka por, ula ong ba ka kyrtong ka NPP ka Kong Ampareen Lyngdoh, ka dei kaba biang tam napdeng baroh ki kyrtong. Ym tang katta, ka dei ka longkmie bad kan wanrah ia ka burom bad ka jingsarong ia ka jaitbynriew ba kan leit rung ha Parliament kum ka MP ryngkat ka riam Khasi nylla.
Phi don ban ong eiei?