New Delhi:Ka Supreme Court, ka la byrthen tyngeh, ia U Anil Masih, Presiding Officer, uba pyniaid ia ka elekshon Mayor ha Chandigarh bad katei ka kashari ba heh duh, ka la pynshisha, ba utei u ophisar, ula pyndam ia kiba bun ki kot thep vote bad la pynsangeh ruh ia ka jingialang kaba nyngkong jong katei ka tnat, kaba la dei ban pynlong, ha ka 7tarik Rymphang 2024.
Ka jingshong bishar, kaba la khlieh da U Chief Justice of India, U DY Chandrachud, ka shim bishar, halor ka jingujor jong u dkhot ka AAP, u Kuldeep Kumar, ha kaba ula ujor halor ka rai jong ka Punjab and Haryana High Court, kaba kyntait ban pynsangeh ia katei ka elekshon bad ba la dawa, ba dei ban pynlong da ka jingpeit pyrman jong u nongbishar ba la shongthait. Na ka liang jong ka kynhun AAP-Congress, ki kynnoh ba u nongpyniaid ia ka elekshon, U Anil Masih, ba ula leh thok ia ki kot thep vote ban pynjop ia ka BJP, ha katei ka elekshon Mayor.
Ha ka jingshong bishar, U Chief Justice Chandrachud, ula bitar shla, da kaba ong “Ka paw shai, ba u Presiding Officer, ula pyndam noh ia ki kot thep vote. U dei ban shah set phatok. Balei ba u peit bha ia ka camera? Mr Solicitor, kane ka dei ka jingpynjot thiaw ia ka hok jong ka synshar paidbah. Ngi sngewdiaw shibun eh”.
“Kane ka dei ka rukom treikam jong u Returning Officer? Ha kano kano ka jaka, kaba don ka jingthoh kaba sharum, u ieh beit kumta, katba haba ka don kaba thoh dak, sha ka jaka kaba shajrong, u pyndam noh ia ka. Sngewbha iathuh ia u Returning Officer, ba ka Supreme Court, ka buddien bha ia u” ong U Chief Justice.
U Chief Justice, ula ong shuh shuh ba ka jingpyniaid beit ia ka elekshon, ka long kaba donkam bha bad ka jingpynjot ia ka synshar paidbah, yn nym lah satia ban shah. La bthah ruh ba ia ki kot ki sla jong katei ka elekshon, ban leit aiti noh sha U Registrar General jong ka Punjab and Haryana High Court.
“Dei ban buh bha baroh ki kot thep vote bad ia ki video ruh kumjuh bad u Returning Officer, u dei ban aiti ia baroh ki kot ki sla” ong U Chief Justice of India bad la bthah ia u, ba un dei ban poi dalade, ha ka 19tarik Rymphang 2024, ba un batai hi dalade, halor ka jingjia, kumba la iohi ha katei ka video.
Ka BJP, ka la jop, ha katei ka elekshon mayor ha Chandigarh, ha kaba u Manoj Sonkar jong ka BJP, ula jop, ia u kyrtong jng ka AAP, u Kuldeep Kumar, da kaba u ioh 16 vote, katba uba ialeh pyrshah, u ioh 12 vote bad 8ngut ki dei kiba shah kyntait.
Phi don ban ong eiei?