San ngut duh bai tymmen, ki Mei Ieid ka Kynroh Nonglyer

Shillong, 21 Jylliew:
San ngut ki Mei Ieid ba la dap 65 snem tam la kynnoh ba ki la shah pyn duh ia ka skhim penson ne baibam tymmen ka Indi ra Gandhi National Old Age Pension Scheme (IGNO APS) kiba dei na ka shnong Kynroh Nonglyer.
Kine ki san ngut kiba la kynnoh ba la shah pynduh ia kane ka skhim ki kynthup ia ka (1) Kong Skem Kurbah, (2) Kong Thim Kyrsian, (3) Kong Jwim Basalarmaw, (4) Kong Bron Nongrum bad (5) Kong Kwet Nongrum.
Kat kum ka jingpyllait khubor, ka CSWO kine ki mei ieid ki la shah pynduh ban ioh ia kane ka skhim la bun snem mynta.
Ka President ka CSWO ka Kong Agnes Kharsiing ka la ong ba kine ki mei ieid ki la leit sha ophis jong u Block Development Office (BDO) ha Mawphlang bad la iathuh ba ia ka pisa la dep thep ha ka Account ha Post Office kaba don ha shnong Krang ha East Khasi Hills.
“Namar ba kim dei kiba nang thoh nang pule, u nongtrei ka Post Office ha Krang u Banriwell Kurbah u la shim ia ka passbook jongki bad um shym la pynlait ia baroh ka pisa jongki”, la ong ka Kong Kharshiing.
Haba ki leit ban sei ia ka pisa, la iathuh ia ki da u Banriwell Kurbah, ba kam don satia ka pisa ha Post office. Ki la leit sha Post Office ha Sohiong, hynrei la iathuh kumjuh ba ym don pisa, la bynrap ka Kong Kharshiing.
Namar ba kim dei kiba kyrshan ia u MLA/MDC ka Sohiong, kine ki mei ieid kim shym la ioh jingiarap eiei na u halor kane ka kam. Bad kaba pynsngewsih ka long ba lada ki leit ruh un nym leh eiei, namar ba kim dei ki nongkyrshan jongu ha ka por elekshon, la ong ka Kong Kharshiiing.
Ka CSWO ka la ong ba namar ba ka dei ka kam bamsap ha Post Office ka tnad CBI (Central Bureau of Investigation) ka lah ban shim kam ia kane ka jingjia bad ban pynlong ia ka jingtohkit ban sei madan ia ka jingshisha.
Ka sorkar jylla ka dei ban phah tohkit da kaba bthah ia ki briew na Block ban leit ban tohkit ia kane ka jingjia kaba la shah knieh ri kitei ki Mei Ieid ia la ki hok jongki.
Ka Post Office ka dei ban ai ia ka jingbthah kaba shai ia ki nongthep pisa khamtam ia ki briew sha jaka nongkyndong ban iarap ia ki ym ban pyndik ban pynmih jingeh pynban, la ong ka Kong Kharshiing.
“Ka Sorkar ka dei ban peit ia kane ka jingjia bad ka tnad CBI ka dei ban shim sou moto ban pynlong ia ka jingtohkit ia kane ka jingjia bamsap”, la ong ka CSWO.