“San kynta poi Dawki, ba iaid baheh ki trok”

Shillong, 6 Naiwieng:
Ka HNYF Southern Riwar Circle ka la maham ba ki trok kit dewiong kim dei ban kit palat pud na mar ba ka la wanrah ia ka jingthut ia ki kali paidbah ba leit iew.
Ha ka kyrwoh ba la pynlait, ka seng ka la ong ba ki trok kit dewiong ki la iaid baheh ha surok kumba dei tang ka surok jongki haduh ba ka la wanrah ia ka jingsahkut kali ha ki surok. Ki kali ba wan iew na thain Nongtalang, Sohkha Lami, bad na than Darrang, Shnongpdeng ki la sahkut kali haduh san kynta eiei bad ki la poi iew haduh 2 baje mynsngi ha jaka ban poi dang step ban wan die ia ki mar ki mata, ong u Bah Tarzan Lymba u general secretary ka seng.
Hynrei mynta lei naduh madan phutbol shaduh Tamabil Petrol Pump, ki ieng lain bad knieh iaid kulmar ki trok ka la wanrah ia ka jingeh ia ki nongleit nongwan sha iew sha hat kiba na thain Muktapur, Rhongkum, ter ter ba ju sah kut kali san ne hynriew kynta man ka sngi iew Dawki.
Ha ka jingshisha, kham mynshwa kala don ka jingthoh ba ka seng HNYF Dawki circle kaba la leit buh ha ophis u SDO (Civil) Amlarem kaba dawa ban pyniaid shiliang ia ki trok khnang ba kan ym thut ka iaid ka ieng kiwei ki kali. Wat u OC ka Dawki Police station u la trei shitom hynrei kane ka jingwan pynbeit iaid kali ki pulit, ka la neh tang shipor.
Halor kane, ka seng ka la kyntu ia u SDO (civil) bad ia u OC ba kin shim khia ban pynbeit noh ia ka jingiaid baheh ki trok kit dewiong ban lait ki paidbah na ka jingshah pynwit, la ong u Bah Lymba.