Sam tiar ka ophis u BDO, sha ki VECs ha Amlarem

Jowai, 22 Naitung:
Ka Ophis jong u Block Development Officer, Amlarem C&RD Block ki la sam ia ki tiar bylla 100 sngi bad kiwei kiwei ki tiar sha ki 92 tylli ki VEC kiba hap hapoh katei ka thain.
Ki tiar kiba la sam sha ki VECs mynta ka sngi ha ka jingialang kaba la long ha ophis jong u BDO ki kynthup ia ki top um kaba 300 litres, ki dawai ban iada kyrkieh haba mynsaw, ki jri Tarpalin, ki borti, ki muk, ki mohkhiew, ki lyngka, ki shuki, ki miej, nalor kiwei kiwei ki tiar kiba donkam ha ophis VEC bad na ka bynta ki nongbylla. Ha katei ka jingialang ban sam ia kitei ki tiar sha ki VECs bapher bapher, la donlang ruh u ADC, CS Laloo , ka SDO Amlarem Civil Sub-Division, ka kong JU Kharpuri bad u BDO u ma S. Sungoh nalor kiwei kiwei.