Sam syrnod u Bah Rowel sha 22 ngut ki FA na Soil Byrnihat

Shillong, 13 Nailur:
Ar phew ar ngut ki Field Assistant (FA) ki la ioh syrnod hadien ba ki la pyndep ia ka jinghikai na Conservation Training Institute ha Byrnihat ka Ri Bhoi District hynne ka sngi. Ia kine ki FA la sam syrnod da u Symbud Myntri Rangbah ba peit ia ka tnad Soil and Water Conservation u Bah Rowel Lyngdoh ba la don lang u Additional Chief Secretary Bah Barkos Warjri nalor ki heh kane ka tnad.
Haba kren ha kane ka sngi, u Bah Rowel u la pynpaw ka jingsngew skhem ba kine kiba la pyndep ia ka jinghikai kiba la ai katkum ki buit bad ki stad mynta, kin lah ban shakri khambha ia ka tnad ba ki don bad khamtam na ka bynta ka jingmyntoi jong ka imlang sahlang bad ka mariang.
“Mynta, phi la ioh ia ka jinghikai, phi dei ban pyndep hok ia la kamram na ka bynta ka jingbit jingbiang jong ki paidbah ka jylla”, la ong u Bah Rowel bad bynrap ba ka long ruh ka jingiaroh ia ki ophisar kiba la ai ia kane ka jinghikai ia kiba shah hikai.
Shwa ia kane, u Additional Chief Secretary, u Bah Barkos P. Warjri u la ong ba kine kiba la pyndep ia ka jinghikai kin ioh ia ka jingtbit kaba biang ban shakri ia ki paidbah ka jylla.
“Ka jingai jinghikai ka long kaba donkam ia ki nongtrei sorkar khnang ba kin lah ban shakri bad pyndep ia ka kam katkum ka jingdonkam”, la ong u Bah Warjri.
U Additional CS u la ong ba ki FA kiba la pyndep ia ka jinghikai kin lah kham bha ban ai ka jinghikai kylla ia ki nongkyndong ha ka rukom ban pynneh ban pynsah ia ka khyndew ka shyiap bad ka mariang.
Katba u Director ka Soil bad Water Conservation Department, u Bah D. Langstieh u la kyntu ia kiba pyndep ia kane ka jinghikai ba kin pyndonkam hok khnang ba kan long ka jingmyntoi ym tang ia ki hynrei ia kiwei ruh
La ioh ia ka jingkren na u Joint Director ka Soil and Water conservation Department, Bah W. Rymbai , u G Kharmujai bad kiwei.
Na ki 22 ngut kiba pyndep ia ka jingai jinghikai, 14 ngut ki dei na ka Soil and Water Conservation Department, uwei na Khasi Hills Autonomous District Council (KHADC), 4 ngut na Jaintia Hills Autonomous District Council (JHADC) bad 3 ngut na Garo Hills Autonomous District Council (GHADC).