Sam syrnod ka NYDA

Shillong, 22 Nailur:
Ka Nongkrem Youth Development Association ha ka 13tarik mynta u bnai, ka la ioh ban pynlong ia ka jingsam ia ki syrnod sha ki khynnah kiba la shah pyntbit bad pyndep ha kaba iadei bad ka Basic Tailoring bad Hand Embroidery kiba hap ha ka MES/SDI Course hapoh ka Skill Development Vocational Training Centre jong ka Seng.
Ha katei ka sngi la wan ban sam ia ki syrnod da u MS Rao (IAS), Principal Secretary, ka sorkar Meghalaya, kum u Kongsan ha ryngkat ka jingsynran lang jong u Director ka Directorate of Employment & Craftsmen Training, Government of Meghalaya, u B. Hajong (MCS) kum u symbud kongsan bad kumjuh ruh ha ryngkat ka jingiadon lang jong U Bah Medistar Warbah, Bakhraw Ka Raid Nongkrem, U Bah Bhalang Lyngdoh, Chairman Nongkrem Dorbar Pyllun bad kiwei kiwei pat ki riew rangbah jong ka shnong, ki dkhot jong ka NYDA bad kumjuh ruh ki khynnah training jong ka.
Ia kane ka prokram la pyniaid da U Bah Arnold Nongbri, President barim jong ka NYDA. La ioh ruh ia ka jingkren lyngkot na U Bah B. Lyngdoh, Chairman ka Nongkrem Dorbar Pyllun bad pynbud pat sa da ka jingrwai kaba sngewthiang na ki khynnah pule Computer jong ka NYDA.
La ioh ruh ia ka jingkren na u symbud kongsan, u ba la batai bniah bha ha kaba iadei bad kane ka training kiba ki khynnah ki lah ioh ban pyndep bad kumjuh ruh ia kiwei pat ki training kiba na ka liang ka Department jong u ka ju ai sha kiba bun ki khynnah samla bad kumjuh ruh ia ki nongshong shnong jong ka ri.
U Kongsan ha ka jingkren jong u, u la kyntu ia ki khynnah baroh kiba wan shah hikai pyntbit hapoh ka Institute jong ka NYDA ba ki dei ban long kiba shim khia ia ka jinghikai bad ban minot bha namar kadei kawei na ki lad kiba khraw tam na ka bynta ka jingim ka ban sa wan.
Bun na ki khynnah samla mynta ki im hapdeng ka jingkyrduh kam kyrduh jam, hynrei kim treh pat ban pyntbit ne leh ia ki kam lajong namar kim sngew iahap ia ki namar kiba bun ki daw.
U la ong ruh ba ka jingioh ia ki syrnod kam pat dei kaba kut hynrei ka jingsdang sha uwei pat u mawjam kata ban ieng ha la ki jong ki kjat bad kumjuh ruh ban wad ki lad ki lynti na ka bynta ka ioh ka kot ha ka imlang ka sahlang.
U la ai ruh ka jingkitbok kitrwiang ia kito ki khynnah kiba la ioh pdiang ia kane ka syrnod ba kin nangkiew ha ki liang bapher bapher.
Ha katei ka sngi ha shwa ban sdang ia ka Programme ban sam syrnod ia ki khynnah kiba la pass ha ki trade bapher bapher, ka NYDA ka la ioh ruh ban plie pyrda ia ka Adventure Programme da u Samla Ricky Cooper Pathaw u ba long u UNV-DYC jong ka Nehru Yuva Kendra, u ba peit ia ka thain Ri Bhoi.
Ha kane ka prokram ka ban neh shi taiew kan don ka jingai jinghikai kumno ban kiew lum, ban kiew ia ki maw bad kiwei kiwei pat kum ka trekking, camping bad kiwei kiwei de.
Ia kane ka prokram la ioh ban pynkut da ka jingkren ai khublei na u General Secretary jong ka Nongkrem Youth Development Association, I Bah Empower Warbah.